მსურს, გამოვხატო ჩვენი გულწრფელი მადლიერება საქართველოსა და ევროკავშირს შორის ბოლო წლებში ევროკავშირის სანქციების გვერდის ავლის თავიდან აცილების კუთხით წარმატებული თანამშრომლობისთვის, რომელიც ორმხრივი ნდობისა და გამჭვირვალობის საფუძველზეა აგებული, - ამის შესახებ საქართველოს საგარეო საქმეთა მინისტრის, მაკა ბოჭორიშვილის წერილშია ნათქვამი, რომელიც სანქციების საკითხებში ევროკავშირის სპეციალურ წარმომადგენელს, დევიდ ო'სალივანს გაეგზავნა.

საქართველოს საგარეო უწყების ხელმძღვანელის წერილში, რომელიც 18 თებერვლით თარიღდება, ნათქვამია, რომ საქართველომ არაერთხელ დაადასტურა თავისი ურყევი ერთგულება, თავიდან აიცილოს საერთაშორისო სანქციების გვერდის ავლა.

„ამ კონტექსტში, მსურს, შევეხო ყულევის პორტის საქართველოში ევროპის საბჭოს მე-20 სანქციების პაკეტში შესაძლო ჩართვას. საქართველომ არაერთხელ დაადასტურა თავისი ურყევი ერთგულება, თავიდან აიცილოს უკრაინის წინააღმდეგ რუსეთის მიერ განხორციელებული აგრესიის საპასუხოდ დაწესებული საერთაშორისო სანქციების გვერდის ავლა. ამ მიზნით ჩვენმა ხელისუფლებამ დანერგა ყოვლისმომცველი, რისკებზე დაფუძნებული შესაბამისობის რეჟიმი ყველა პორტში, რაც უზრუნველყოფს პრევენციული ზომების მკაცრად გამოყენებას, როგორებიცაა სავალდებულო წინასწარი შემოწმება, ბენეფიციარების მფლობელობის დადასტურება, დამზღვევებისა და კლასიფიკაციის საზოგადოებების შემოწმება, AIS-ის ისტორიის ანალიზი, სააგენტოთაშორისი კოორდინაცია და პორტში წვდომის უარყოფა სანქციების რისკების იდენტიფიცირების შემთხვევაში. 2022-დან 2026 წლამდე სანქციებთან დაკავშირებული შეშფოთების გამო 55 გემს არ მიეცა საქართველოს პორტებში შესვლის უფლება; 2 500-ზე მეტი სანქცირებული ტვირთი დაბრუნდა; ხოლო 1 750-ზე მეტ ექსპორტსა და რეექსპორტის ოპერაციაზე უარი ეთქვა", - ნათქვამია წერილში.

ამასთან, როგორც დევიდ ო'სალივანისთვის გაგზავნილ წერილში მაკა ბოჭორიშვილი აღნიშნავს, მნიშვნელოვანია, რომ ყულევის პორტში სანქციების გვერდის ავლის, არარეგულარული გადაზიდვების პრაქტიკის ან ევროკავშირის შემზღუდავი ზომების დარღვევის დადასტურებული შემთხვევები არ დაფიქსირებულა.

„გარდა ამისა, საქართველოს ხელისუფლებას არასდროს მიუღია რაიმე ოფიციალური შეტყობინება, რომელიც შეშფოთებას გამოთქვამდა ან ამ მხრივ შეუსრულებლობაზე მიუთითებდა. ასევე, მნიშვნელოვანია, აღინიშნოს, რომ ყულევის ტერმინალი, რომელსაც აზერბაიჯანის რესპუბლიკის სახელმწიფო ნავთობკომპანიის, SOCAR-ის შვილობილი კომპანია Black Sea Terminal Ltd-ი მართავს, მნიშვნელოვან როლს ასრულებს კასპიის ზღვის აუზის ქვეყნების ენერგეტიკულ დერეფანში. ის ხელს უწყობს ენერგეტიკული მარშრუტების დივერსიფიკაციას, აძლიერებს შავი ზღვის ლოგისტიკის მდგრადობას და მხარს უჭერს შუა დერეფნის უფრო ფართო ჩარჩოს. ამ ტერმინალის მიმართ ნებისმიერი შემზღუდავი ზომა მნიშვნელოვან გავლენას მოახდენს არა მხოლოდ საქართველოსთვის, არამედ აზერბაიჯანის ენერგეტიკული ექსპორტის ინფრასტრუქტურაზე, განსაკუთრებით მაშინ, როდესაც ენერგეტიკის დივერსიფიკაცია ევროკავშირისთვის მთავარ სტრატეგიულ პრიორიტეტად რჩება. საქართველოს მთავრობის სახელით, კიდევ ერთხელ ვადასტურებ ჩვენს მტკიცე ვალდებულებას, გავუმკლავდეთ შეცდომაში შემყვანი საზღვაო პრაქტიკით გამოწვეულ რისკებს. საქართველო კვლავ სრულად ერთგულია ყოვლისმომცველი, რისკებზე დაფუძნებული სკრინინგისა და შესაბამისობის ზომების განხორციელებისა, რომლებიც მიზნად ისახავს როგორც „ჩრდილოვანი ფლოტების", ასევე ევროკავშირის მიერ სანქცირებული გემების საქმიანობის იდენტიფიცირებას და პრევენციას, IMO-ს A.1192(33) რეზოლუციისა და საბჭოს (EU) No 833/2014 რეგულაციის XLII დანართის მკაცრი დაცვით. ჩვენ არც მიგვიცია უფლება და არც ვაპირებთ ევროკავშირის მიერ სანქცირებულ გემებს ჩვენს პორტებში შესვლის ან მომსახურების მიღების ნება დავრთოთ და ჩვენ გავაგრძელებთ „ჩრდილოვანი ფლოტის" პრაქტიკის წინააღმდეგ ბრძოლის საერთაშორისო ძალისხმევის აქტიურად მხარდაჭერას", - ნათქვამია წერილში.

ასევე, საქართველოს საგარეო საქმეთა მინისტრი აცხადებს, რომ ქვეყანამ კიდევ უფრო გააძლიერა თანამშრომლობა სანქციების აღსრულების უზრუნველსაყოფად.

„საქართველოში თქვენი ვიზიტის შემდეგ ჩვენ გავაძლიერეთ თანამშრომლობა სანქციების აღსრულების უზრუნველსაყოფად, საქართველოს ფინანსთა სამინისტროს შემოსავლების სამსახურსა და ევროკავშირის შესაბამის სამსახურებს - TAXUD, FISMA, FPI, JUST და TRADE - შორის საკომუნიკაციო არხების შექმნით, რაც ხელს უწყობს რუსეთის ფედერაციის წინააღმდეგ შემზღუდავი ზომების მონიტორინგსა და აღსრულებას, ინფორმაციის სწრაფ გაცვლას და ურთიერთდახმარებას, რეგულარული განახლებებითა და აღსრულების მონაცემების პერიოდული გაზიარებით, მათ შორის გაძლიერებული კონტროლის ქვეშ მყოფი ოპერაციების ჩათვლით. პარალელურად, როგორც შავი და კასპიის ზღვა II (BCSEAII) პროექტის ბენეფიციარი, საქართველო მონაწილეობს T-AIS მონაცემთა ორმხრივ გაცვლაში ევროკავშირის წევრ სახელმწიფოებთან SafeSeaNetMediterranean (MAREZ:) სერვერის მეშვეობით, რაც აძლიერებს საზღვაო სიტუაციურ ცნობიერებას, ანომალიების გამოვლენას და რისკის ინდიკატორებზე კოორდინაციას AIS-ისა და დეკლარირებული მოგზაურობის მონაცემების ჯვარედინი ვერიფიკაციის გზით. ამ ძალისხმევის შემდგომი ინსტიტუციონალიზაციისა და გაძლიერების მიზნით საქართველოს მთავრობა გვთავაზობს ევროკავშირთან სტრუქტურირებული ოპერაციული არხის შექმნას, მათ შორის დანიშნულ საკონტაქტო პირებს, დროულ განმარტებებს თითოეული შემთხვევისთვის და უკუკავშირის სისტემას საქართველოს ხელისუფლების მიერ მიღებული ზომებისა და გადაწყვეტილებების ეფექტურობის შესახებ. ჩვენ კვლავაც დარწმუნებულები ვართ, რომ საქართველოს მკაფიო პოზიცია, ევროკავშირის შემზღუდავი ზომების მკაცრი განხორციელებისადმი ჩვენს მიერ დემონსტრირებული ერთგულების პარალელურად, ევროკომისიას დაეხმარება ყულევის პორტის სანქციების სიაში შეტანის საკითხის ხელახლა განხილვაში", - ნათქვამია წერილში.

სანქციების საკითხებში ევროკავშირის სპეციალური წარმომადგენლის, დევიდ ო'სალივანის წერილში, რომლითაც საქართველოს საგარეო საქმეთა მინისტრს, მაკა ბოჭორიშვილს აცნობა, რომ ევროკავშირმა ყულევის ნავთობის ტერმინალი სანქციათა მე-20 პაკეტიდან ამოიღო, ასევე ნათქვამია: „მივესალმები საქართველოს ხელისუფლების ვალდებულებას, რომ საქართველო არ დაუშვებს ევროკავშირის მიერ სანქცირებული გემების პორტებში შესვლას ან მომსახურების მიღებას".