ადამიანის უფლებათა დაცვისა და სამოქალაქო ინტეგრაციის კომიტეტმა პირველი მოსმენით განიხილა „შვილად აყვანისა და მინდობით აღზრდის შესახებ" კანონში ცვლილება, რომელიც მშვილებლის/მინდობით აღმზრდელის სოციალურ-ეკონომიკური მდგომარეობის შეფასების განახლებული რეგულაციების დადგენას ითვალისწინებს.

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილის, ირინე წაქაძის განცხადებით, ოჯახს ან პირს, რომელსაც ბავშვის შვილად აყვანა სურს, დაევალება სოციალურად დაუცველი ოჯახების მონაცემთა ერთიანი ბაზიდან ამონაწერის ნაცვლად ზრუნვის სააგენტოში ის დოკუმენტები წარადგინოს, რომლებსაც ამ საკანონმდებლო ცვლილებების საფუძველზე, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი დაამტკიცებს.

კანონპროექტის თანახმად, პროცესის პირველ ეტაპზე (შვილად აყვანის მსურველი პირის მონაცემთა ბაზაში რეგისტრაცია) და მომდევნო ეტაპზე (შეთავაზებული ბავშვის შვილად აყვანაზე თანხმობის გაცხადება) მინისტრის ბრძანებით დადგენილი დოკუმენტაციის საფუძველზე შესაძლებელი იქნება, დადგინდეს მშვილებლის სოციალურ-ეკონომიკური მდგომარეობის მდგრადობა, რაც სხვა გარემოებებთან ერთად, ბავშვის საუკეთესო ინტერესების უპირატესი გათვალისწინების მიზანს ემსახურება.

მინისტრის ბრძანებით დადგენილ დოკუმენტაციაში იგულისხმება: პირის/ოჯახის შემოსავლების, ქონებრივი მდგომარეობისა და სოციალურ-ეკონომიკური მდგომარეობის ამსახველი დოკუმენტები, მათ შორის, საჯარო და კერძო დაწესებულებებიდან წარმოდგენილი ოფიციალური დოკუმენტაცია.

პროექტში მოცემულია გარდამავალი რეგულაციები.

„ჩვენი მიზანია, რომ შვილად ამყვანთა ბაზაში რეგისტრირებული ოჯახების მდგომარეობა არ გაუარესდეს. აქედან გამომდინარე, იმ 1500 ოჯახს თუ მშვილებელ პირს, რომელიც დღეს ბაზაშია, პირველი ეტაპის დოკუმენტაციის წარდგენის ვალდებულება დაკმაყოფილებულად ჩაეთვლება, ვინაიდან მათ სოციალურად დაუცველი ოჯახების მონაცემთა ერთიანი ბაზიდან შესაბამისი ამონაწერი უკვე წარდგენილი აქვთ. მათ ასევე აღარ მოუწევთ ყოველწლიურად განმეორებით გაიარონ გადამოწმება და წარუდგინონ მეურვეობის და მზრუნველობის ორგანოს მათი მატერიალური მდგომარეობის ამსახველი დოკუმენტი.

რაც შეეხება ბოლო ეტაპს, როცა შვილად აყვანაზე მიდგება საქმე, ისინი ვალდებულები იქნებიან თანაბრად, ზოგადი წესით წარმოადგინონ ის დოკუმენტები, რომლებიც მინისტრის ბრძანებით იქნება დამტკიცებული", - აღნიშნა მომხსენებელმა.

კანონპროექტის თანახმად, მშვილებლად რეგისტრირებული პირი, რომელსაც არ გაუვლია შვილად აყვანის სავალდებულო მოსამზადებელი კურსი, ვალდებული იქნება, გაიაროს აღნიშნული კურსი და მისი გავლის დამადასტურებელი სერტიფიკატი სააგენტოს წარუდგინოს გასაშვილებელი ბავშვის მისთვის შეთავაზებიდან შვილად აყვანის შესახებ დასკვნის შესაბამისი რაიონული (საქალაქო) სასამართლოსთვის წარდგენამდე.