საქართველოს ეროვნულ ბოტანიკურ ბაღში 6 და 7 დეკემბერს შოკოლადის საახალწლო ფესტივალი გაიმართება.

თბილისის მერიის ინფორმაციით, ღონისძიება ბასტი-ბუბუს კონცერტით გაიხსნება.

წარმოდგენილი იქნება საქართველოში წარმოებული ხელნაკეთი შოკოლადების მრავალფეროვნება, საახალწლო ხელნაკეთი ნივთები და თემატური დეკორაციები.

მოსულ სტუმრებს მთელი დღის განმავლობაში სანტა და ბევრი გათამაშება დახვდებათ.

ფესტივალზე შოკოლადიანი ჩურჩხელების, საახალწლო გვირგვინებისა და შოკოლადიანი თათარას მოდუღების მასტერკლასიც გაიმართება. ღონისძიებას მუსიკალურად ბენდი გააფორმებს.

ფესტივალის ფარგლებში, ბავშვებისთვის ბოტანიკური ბაღის ეკოსაგანმანათლებლო აქტივობები ჩატარდება.

ეროვნულ ბოტანიკურ ბაღში შოკოლადის ფესტივალი უკვე მეშვიდედ გაიმართება. წელს ფესტივალში მონაწილეობას 30-მდე კომპანია მიიღებს, მათ შორის არიან დამწყები მეწარმეები და ყველასათვის კარგად ნაცნობი შოკოლადის მწარმოებელი კომპანიებიც.

შოკოლადის საახალწლო ფესტივალი 6 და 7 დეკემბერს, 12:00 საათიდან 19:00 საათამდე გაგრძელდება.