"პატრიარქი იყო საზომი ურთიერთობის, ღირსების, სიყვარულისა და თავდადებისა," - ილია მეორის როლსა და მის ღვაწლზე ისაუბრა ბათუმისა და ლაზეთის მიტროპოლიტმა, ბათუმის ღვთისმშობლის სახელობის საკათედრო ტაძარში ქადაგებისას.

მეუფე დიმიტრის განცხადებით, საქართველოს კათოლიკოს-პატრიარქი და ქართველი ხალხის სულიერი მამა მთელ ერს დააკლდა.

"ვხედავდი ატირებულ, მგლოვიარე ადამიანებს და საოცარი გრძნობა მეუფლებოდა, გრძნობა იმისა, რომ ის, ვისაც განიცდი, ვისაც მთელი ცხოვრება თვლიდი, რომ შენი ოჯახის ნაწილია, მარტო შენი არ ყოფილა, ის არის უამრავი ადამიანის ოჯახის წევრიც და ეს იყო უდიდესი სიხარულნარევი გლოვა. პატრიარქი იყო საზომი ურთიერთობისა, ღირსებისა, სიყვარულისა, თავდადებისა," - აღნიშნა ბათუმისა და ლაზეთის მიტროპოლიტმა, მეუფე დიმიტრიმ (შიოლაშვილი).