უკრაინის პრეზიდენტის ვოლოდიმირ ზელენსკის ბრძანებულებით, სამშვიდობო მოლაპარაკებებში მონაწილეობის მისაღებად უკრაინის დელეგაცია, ცხრა წევრი იქნება, მათ შორის ეროვნული უსაფრთხოებისა და თავდაცვის საბჭოს მდივანი რუსტემ უმეროვი, მთავარი დაზვერვის სამმართველოს ხელმძღვანელი კირილო ბუდანოვი, უკრაინის უსაფრთხოების სამსახურის უფროსის მოადგილე ვადიმ პოკლადი და უკრაინის შეიარაღებული ძალების გენერალური შტაბის უფროსი ანდრიი გნატოვი. ინფორმაციას უკრაინული მედია ავრცელებს.

დოკუმენტის თანახმად, მტკიცდება „უკრაინის დელეგაციის ახალი შემადგენლობა, რომელიც მონაწილეობას მიიღებს მოლაპარაკებების პროცესში ამერიკის შეერთებულ შტატებთან და უკრაინის სხვა საერთაშორისო პარტნიორებთან, ასევე რუსეთის ფედერაციის წარმომადგენლებთან, სამართლიანი და მდგრადი მშვიდობის მისაღწევად".

დელეგაციის შემადგენლობაში ასევე შედიან პრეზიდენტის მრჩეველი ალექსანდრ ბევზი, საგარეო დაზვერვის სამსახურის უფროსი ოლეჰ ივაშჩენკო, საგარეო საქმეთა მინისტრის პირველი მოადგილე სერჰიი კისლიცია, ეროვნული უსაფრთხოებისა და თავდაცვის საბჭოს მდივნის პირველი მოადგილე ევგენი ოსტრიანსკი და თავდაცვის სამინისტროს მთავარი დაზვერვის სამმართველოს უფროსის მოადგილე ვადიმ სკიბიცკი.