უკრაინის დელეგაცია, რომელსაც ქვეყნის პრეზიდენტის ადმინისტრაციის ყოფილი ხელმძღვანელის, ანდრეი ერმაკის ნაცვლად, ეროვნული უსაფრთხოებისა და თავდაცვის საბჭოს თავმჯდომარე უსტემ უმეროვი ხელმძღვანელობს, „სამშვიდობო გეგმაზე" მოლაპარაკებების გასაგრძელებლად აშშ-ში გაემგზავრა. ინფორმაციას ამის შესახებ უმეროვი სოციალურ ქსელში ავრცელებს.

„უკრაინის დელეგაცია უკვე მიემგზავრება შეერთებულ შტატებში, რათა გააგრძელოს სამართლიანი და მდგრადი მშვიდობის მიღწევისკენ მიმართული შემდეგი ნაბიჯების კოორდინაცია.

დღეს დილით ვესაუბრე უკრაინის პრეზიდენტს და მოვახსენე მზადების მდგომარეობა, ძირითადი პოზიციები და მოლაპარაკებების მომავალი ეტაპის მოსალოდნელი შედეგები. შეერთებულ შტატებში ჩვენ გავაგრძელებთ ჟენევაში შეხვედრების დროს შესრულებული ყველა სამუშაოს კოორდინაციას. უკრაინა აგრძელებს სისტემატურ და კონსტრუქციულ დიპლომატიურ მუშაობას ღირსეული მშვიდობისთვის", - წერს უმეროვი.

ამასთან, უკრაინული მედიის ცნობით, დელეგაციაში არ არის უკრაინის მთავარი სადაზვერვო სამმართველოს უფროსი კირილ ბუდანოვი. მათივე ცნობით, ბოდანოვი კიევში იმყოფება.

ანდრეი ერმაკმა უკრაინის პრეზიდენტის ადმინისტრაციის ხელმძღვანელის პოსტი 28 ნოემბერს დატოვა. იქამდე კი ერმაკის ოფისში ეროვნული ანტიკორუფციულმა ბიურომ ჩხრეკა ჩაატარა. რა საქმეზე მიმდინარეობდა ჩხრეკა, ოფიციალურად ჯერ არ გამოუცხადებიათ. ინფორმაცია დაადასტურა თავად ერმაკმაც. მისი თქმით, სამართალდამცველებთან თანამშრომლობს და ანტიკორუფციული ბიუროს ოფიცრებს „სახლზე სრული წვდომის უფლება" მისცა.