ტრამპი ერთ რამეშია დარწმუნებული - უკრაინა ამ ომს ვერ მოიგებს და დანაკარგები უნდა შეამციროს, - წერს ბრიტანული გამოცემა The Guardian-ი.

„რაც არ უნდა ხშირად ახერხებდეს ევროპა ტრამპის ქანქარას რუსეთისგან მოშორებას, ქანქარა ისევ პუტინის მიმართ ბუნებრივ სიმპათიას უბრუნდება. ყოველ ჯერზე, როცა ევროპა გრძნობს, რომ ტრამპს თითქმის დაარწმუნა იმაში, რომ რუსეთი აგრესორია და საფრთხეს უქმნის ევროპულ და, შესაბამისად, აშშ-ის უსაფრთხოებას, ტრამპი პუტინს კიდევ ერთ შანსს, „კიდევ ორ კვირას", კიდევ ერთ სატელეფონო ზარს აძლევს. ტრამპი ერთ რამეშია დარწმუნებული - უკრაინა ამ ომს ვერ მოიგებს და დანაკარგები უნდა შეამციროს", - ნათქვამია სტატიაში.

„მაგრამ ომის დასრულების შესახებ ამერიკულ-რუსული 28-პუნქტიანი გეგმის გამოჩენამდე - და შემდგომში იმის გაცხადებამდე, რომ უიტკოფი თითქოსდა წვრთნიდა რუს ოფიციალურ პირებს, თუ როგორ მოეგოთ ტრამპის კეთილგანწყობა - ევროპელ ლიდერებს არ უნახავთ, თუ ზუსტად როგორ წარმოედგინათ აშშ-ის ოფიციალურ პირებს ევროპული წესრიგი, რომელშიც რუსეთი, რეალიზმის სახელით, ჯილდოვდება და არ ისჯება უკრაინაში უკანონო შეჭრისთვის. ტრამპისგან კიდევ ერთხელ მოულოდნელობის წინაშე დამდგარმა ევროპელმა ლიდერებმა ამერიკული წინადადების აბზაცები დაუჯერებლობისა და პანიკის ნაზავით წაიკითხეს", - აღნიშნულია სტატიაში.

საფრანგეთის ყოფილმა პრეზიდენტმა, ფრანსუა ოლანდმა განაცხადა: „ჩვენ ვცხოვრობთ ისტორიულ და დრამატულ მომენტში. ის ისტორიულია, რადგან ეს გეგმა არა მხოლოდ უკრაინის კაპიტულაციას ნიშნავს, არამედ ევროპის დაქვეითებასაც რუსულ-ამერიკული კონდომინიუმის მეთვალყურეობის ქვეშ".

ჟოზეფ ბორელმა, კაია კალასის წინამორბედმა ევროკავშირის საგარეო საქმეთა ხელმძღვანელის პოსტზე, აღნიშნა, რომ „უკრაინაში ომის დასრულების 28-პუნქტიანი გეგმის ფონზე, ტრამპის შეერთებული შტატები ვეღარ ჩაითვლება ევროპის მოკავშირედ, რადგან ევროპას საკუთარ უსაფრთხოებასთან დაკავშირებულ საკითხებზე კონსულტაციასაც კი არ უწევენ".