რუსეთის პრეზიდენტის, ვლადიმერ პუტინის თანაშემწის, იური უშაკოვის განცხადებით, აშშ-მა რუსეთთან მტკიცე შეთანხმების მიღწევის პირობა დადო. მისი თქმით, „ამერიკელები იფიცებიან, რომ თუ ტრამპი რამეზე დათანხმდება, ეს ურყევი იქნება".

რუსეთის პრეზიდენტის თანაშემწის განცხადებით, თეთრი სახლის წარმომადგენლები ხაზგასმით აღნიშნავენ, რომ განსხვავდებიან თავიანთი წინამორბედისგან, რომლებმაც ომი წამოიწყეს.

ამასთან, იური უშაკოვი აღნიშნავს, რომ მოსკოვი ვაშინგტონთან საკითხის გრძელვადიანი მოგვარების კონტექსტში მუშაობს, ცეცხლის შეწყვეტასთან დაკავშირებით კი საუბარი არ მიმდინარეობს.

„მხარეები ცდილობენ მოლაპარაკებას რთულ დებულებებზე, რომლებიც მომავალი შეთანხმების ფორმასა და ბედს განსაზღვრავს. უკრაინასთან დაკავშირებული ზოგიერთი საკითხი მოითხოვს, რომ შეერთებულმა შტატებმა თავის დოკუმენტებში რადიკალური ცვლილებები შეიტანოს", - აცხადებს უშაკოვი.

ვლადიმერ პუტინის თანაშემწე ასევე აღნიშნავს, რომ ფრონტის ხაზზე რუსული არმიის წინსვლამ ამერიკულ დელეგაციასთან მოლაპარაკებებისთვის უფრო ხელსაყრელი გარემო შექმნა. მისივე თქმით, რუსულმა და ამერიკულმა მხარეებმა ერთმანეთის პოზიციები უკეთ გაიგეს.