იტალიაში, სიცილიის ქალაქ ნისშემის 25 000 მცხოვრები უკვე რამდენიმე დღეა 25 მეტრიანი სიღრმის უფსკრულის პირას ცხოვრობს- ინფორმაცია the guardian-ი ავრცელებს.

25 იანვარს, ციკლონ "ჰარის" მიერ გამოწვეული ძლიერი წვიმების შემდეგ, დამანგრეველმა მეწყერმა ქალაქის მთელი ფერდობი ჩამოშა და 4 კილომეტრიანი უფსკრული შექმნა. გზები ჩამოინგრა, მანქანები მიწამ შთანთქა და ურბანული ქსოვილის მთელი მონაკვეთები ქვემოთ მდებარე ხეობაში ჩაეფლო.

ათობით სახლი სახიფათოდ არის ჩამოკიდებული მეწყერის კიდეზე, ხოლო მანქანები და გზის ფრაგმენტები საათ-საათობით იშლება არასტაბილური ნიადაგის დატვირთვის გამო.

როგორც მედია წერს, ხელისუფლებამ ამ დროისთვის 1600-ზე მეტი ადამიანის ევაკუაცია მოახდინა. ისტორიული ცენტრის მთელი მონაკვეთები რისკის ქვეშაა, მათ შორის მე-17 საუკუნის ეკლესიები, რომლებიც ნებისმიერ მომენტში შეიძლება  ჩამოიშალოს.

გეოლოგებისა და გარემოსდაცვითი ექსპერტების აზრით, ნისშემიში მეწყერი იმის უახლესი ნიშანია, თუ როგორ ცვლის კლიმატის საგანგებო მდგომარეობა ხმელთაშუა ზღვას, სადაც ათწლეულების განმავლობაში არასრულყოფილი სამშენებლო პოლიტიკისა და ურბანიზაციის უკონტროლო მოდელის მიმართ გულგრილობა იყო.

"ეს ყველაფერი რამდენიმე წამში მოხდა", - ამბობს 70 წლის სალვატრიჩე დისკა. ის ცხოვრობდა ერთ-ერთ სახლში, რომელიც ამჟამად ხელისუფლების მიერ წითელ ზონაშია მოქცეული, როგორც ჩამონგრევის საფრთხის ქვეშ მყოფი. "დენი გაითიშა და რამდენიმე წუთის შემდეგ პოლიციამ კარზე დააკაკუნა. გვითხრეს, რომ დაუყოვნებლივ წავსულიყავით, ყველაფერი მიგვეტოვებინა და მხოლოდ აუცილებელი ნივთები - რამდენიმე საბანი და წამალი - წაგვეღო. ერთი კვირის განმავლობაში ვერც კი ვრეცხავდით და ვერც ტანსაცმელს ვიცვლიდით".

ევაკუირებულთა უმეტესობა ნათესავებთან რჩება, ხოლო ხანდაზმულები მოხუცებულთა სახლებში გადაიყვანეს. სხვები დროებით სასტუმროებში არიან განთავსებულნი. წითელი ზონის გარეთ მეხანძრეებმა კარავი გაშალეს, სადაც მაცხოვრებლები სამაშველო სამსახურის წარმომადგენლების თანხლებით ელოდებიან ძვირფასი ნივთების, ფოტოების და ნახატების ამოღებას, რომლებიც სახლებიდან გაქცევისას ვერ შეაგროვეს.

ქალაქში სიჩუმე ჩამოწვა, ისეთი, როგორიც კატასტროფის წინ ხდება: ქუჩები დაცარიელდა, ურბანული ლანდშაფტი მეწყერის შემდეგ მოჩვენებათა ქალაქად იქცა.

ნისშემიდან რამდენიმე კილომეტრში მდებარე გელას პროკურატურამ გამოძიება დაიწყო გაუფრთხილებლობით გამოწვეული კატასტროფის შესახებ.

"ჩვენ ვიკვლევთ მასალების მნიშვნელოვან ნაწილს, მათ შორის იტალიის კოსმოსური სააგენტოს მიერ მოწოდებულ სურათებს", - თქვა გელას მთავარმა პროკურორმა სალვატორე ველამ.

ნისშემიში მომხდარი შემთხვევა იზოლირებული შემთხვევა არ არის. გეოლოგებისა და გარემოსდაცვითი ექსპერტების აზრით, ეს ათწლეულების განმავლობაში უგუნური საბინაო და დაგეგმარების პოლიტიკის შედეგია, რომელიც მეორე მსოფლიო ომის შემდეგ დიდწილად უგულებელყოფდა ქვეყნის მწვავე ჰიდროგეოლოგიურ დაუცველობას.