უახლოეს დღეებში, სლოვაკეთი სარჩელს შეიტანს ევროკავშირის მიერ რუსული გაზის იმპორტის აკრძალვის შესახებ კვალიფიციური უმრავლესობით მიღებული გადაწყვეტილების გასაუქმებლად და წინასწარ აკრძალვას მოითხოვს - განაცხადა პრემიერ-მინისტრმა რობერტ ფიცომ.

ფიცოს თქმით, სარჩელს ევროკავშირის სასამართლოში შეიტანენ. ამასთან, მან რეგულაციის მიღების წესი გააკრიტიკა.

"სლოვაკეთის მთავრობის აზრით, ეს აშკარა დარღვევაა ყველა იმ პრინციპისა, რომელზეც ევროკავშირის ხელშეკრულებებია დაფუძნებული", - განაცხადა ფიცომ და დასძინა, რომ სანქციებსა და საგარეო პოლიტიკის საკითხებზე გადაწყვეტილებები ერთხმად უნდა იყოს მიღებული.

უნგრეთმა უკვე შეიტანა სარჩელი აკრძალვის წინააღმდეგ, ხოლო სლოვაკეთმა ადრე განაცხადა, რომ იმავეს გააკეთებდა. ფიცოს განმარტებით, მთავრობა სარჩელს 27 აპრილამდე შეიტანს.

ცნობისთვის, რუსული გაზის იმპორტის აკრძალვა, რომელიც 2027 წლის ბოლოსთვის ამოქმედდება, ქვეყნების აბსოლუტურმა უმრავლესობამ დაამტკიცა, რამაც ევროკავშირს საშუალება მისცა, სლოვაკეთის და უნგრეთის წინააღმდეგობა დაეძლია, როდესაც ალიანსმა აღნიშნული კანონი მიმდინარე წელს დაამტკიცა.