ჩვენ ევროპის იმედი არ გვაქვს, მათ უნდა დაასრულონ ჰორმუზის შესახებ პომპეზური კონფერენციები და ნავში ჩასხდნენ, - ამის შესახებ აშშ-ს ომის მდივანი პიტ ჰეგსეტი აცხადებს.

„ევროპამ და აზიამ ათწლეულების განმავლობაში ისარგებლეს ჩვენი დაცვით, მაგრამ უფასოდ მგზავრობის დრო დასრულდა. ამერიკა და თავისუფალი მსოფლიო იმსახურებენ მოკავშირეებს, რომლებიც ქმედუნარიანი, ერთგული არიან და ესმით, მოკავშირეობა ცალმხრივი ქუჩა არ არის, ეს ორმხრივი ქუჩაა. ჩვენ ევროპის იმედი არ გვაქვს, მაგრამ მათ ჰორმუზის სრუტე ჩვენზე ბევრად მეტად სჭირდებათ და, შესაძლოა, აჯობებს, ნაკლები ილაპარაკონ, ნაკლები პომპეზური კონფერენციები ჩაატარონ და ჩასხდნენ ნავში. ეს მათი ბრძოლა უფროა, ვიდრე ჩვენი", - განაცხადა ჰეგსეტმა.

მისი თქმით, ირანის პორტების ბლოკადა „სულ უფრო ძლიერდება".

„არავინ გადაადგილდება ჰორმუზის სრუტიდან მსოფლიოს არცერთ წერტილში შეერთებული შტატების საზღვაო ძალების ნებართვის გარეშე. თეირანის რეჟიმისთვის ბლოკადა საათობრივად მკაცრდება. ჩვენ ვაკონტროლებთ", - განაცხადა ჰეგსეტმა.

მისივე თქმით, „ირანის ომი მსოფლიოსთვის საჩუქარია". „ეს არის თამამი და საშიში მისია. საბოლოო ჯამში, ირანს ბირთვული იარაღი არ ექნება. ეს არის საჩუქარი მსოფლიოსთვის", - განაცხადა ჰეგსეტმა.

აშშ-ის ომის მდივნის თქმით, თეირანს „აქვს შანსი, დადოს გონივრული გარიგება".

ამასთან, ჰეგსეტს დაუსვეს კითხვა: „გავრცელებული ინფორმაციით, ევროპაში ავიაციის საწვავის მარაგი მხოლოდ დაახლოებით ექვს კვირას ეყოფათ, ხოლო ამ საწვავის უმეტესობას ისინი სპარსეთის ყურიდან იღებენ. მოგმართათ თუ არა რომელიმე ევროპულმა ქვეყანამ დახმარებისთვის, რათა მონაწილეობა მიიღოს ჰორმუზის სრუტის უსაფრთხოების უზრუნველყოფასა და ესკორტირებაში?".

პიტ ჰეგსეტმა კითხვაზე პასუხისას აღნიშნა: „ვიცი, ამაზე ბევრი საუბარია. თქვენ ნახეთ, გასულ კვირას ევროპაში გამართული, ჩემი აზრით, სასაცილო კონფერენცია, სადაც შეიკრიბნენ და ისაუბრეს, რომ იქნებ, ოდესმე რამე გააკეთონ, როცა ყველაფერი დასრულდება. ეს სერიოზული ძალისხმევა არ არის".

მისივე თქმით, აშშ-ი მიესალმება ევროპის სერიოზულ მცდელობას, რამე გააკეთონ სრუტესა და საზღვაო მარშრუტთან დაკავშირებით, რადგან ყველაზე მეტად საფრთხის ქვეშ სწორედ მათი ენერგეტიკული შესაძლებლობებია.

„ვფიქრობ, ეს გამოფხიზლების სიგნალია. ეს არის გამოფხიზლების სიგნალი მსოფლიოს ქვეყნებისთვის ან გაქვთ შესაძლებლობები, ან არა. წინააღმდეგ შემთხვევაში, თქვენ ისეთ ქვეყანაზე ხართ დამოკიდებული, როგორიც ირანია და ერთადერთი, რომელსაც ამის შეცვლა შეუძლია, არის ამერიკის შეერთებული შტატების სამხედრო ძალები", - განაცხადა პიტ ჰეგსეტმა.