ევროკავშირის უმაღლესმა დიპლომატმა, კაია კალასმა განაცხადა, რომ აშშ-ის გადაწყვეტილებამ გერმანიიდან ათასობით სამხედროს გაყვანის შესახებ ევროპელი ლიდერები მოულოდნელობის წინაშე დააყენა.

ერევანში, „ევროპული პოლიტიკური გაერთიანების" სამიტის ფარგლებში საუბრისას, კალასმა აღნიშნა: „ევროპიდან ამერიკული ჯარების გაყვანაზე საუბარი დიდი ხანია მიმდინარეობს, თუმცა, რა თქმა უნდა, ამ განცხადების დრო მოულოდნელი აღმოჩნდა".

მისი ეს განცხადება მოჰყვა გავრცელებულ ინფორმაციას იმის შესახებ, რომ პენტაგონი მომდევნო 6-დან 12 თვემდე პერიოდში გერმანიიდან დაახლოებით 5 000 სამხედროს გაყვანას გეგმავს.

შაბათს, ფლორიდაში ჟურნალისტებთან საუბრისას, აშშ-ის პრეზიდენტმა, დონალდ ტრამპმა კიდევ ერთხელ დაადასტურა ეს გეგმა და აღნიშნა, რომ გერმანიაში სამხედრო წარმომადგენლობა „5 000-ზე ბევრად მეტით" შემცირდება.

კალასმა ეს ნაბიჯი ევროპული თავდაცვისთვის ერთგვარ „გამოფხიზლებად" შეაფასა და ხაზგასმით აღნიშნა, რომ ამერიკულ ძალებზე დაყრდნობა გარანტირებული აღარ არის.

„ვფიქრობ, ეს აჩვენებს, რომ ჩვენ ნამდვილად უნდა გავაძლიეროთ ნატოს ევროპული საყრდენი და მეტი უნდა გავაკეთოთ", - განაცხადა მან. „ამერიკული ჯარები ევროპაში მხოლოდ ევროპული ინტერესების დასაცავად კი არ იმყოფებიან, არამედ ამერიკული ინტერესებისთვისაც".