"ეს ხომ ძირს ნაყარია და ამას არავინ აღარ შეჭამს," - წერს სოციალურ ქსელში, სუს-ის ყოფილი მაღალჩინოსანი სოსო გოგაშვილი, რითაც ეხმიანება "ქართული ოცნებიდან" წასული სამი დეპიტატის მიერ გავრცელებულ ერთობლივ განცხადებას ეხმაურება:

"ერთი წინადადება დააკლდა განცხადებას:

ევროკავშირი, აშშ და დიდი ბრიტანეთი საქართველოს მტრები არიან... სამარცხვინოა!

ბუნებრივია ეს არ არის "ტროიკის" პირადი მოსაზრება - განცხადება.

ეს პათოსი დიდი ხანია ჟღერდება და ჩანს უმეტესი ოფიციალური პირების მოქმედებებში.

"ჩვენ არაფერ შუაში ვართ ეს სამეულმა თქვა" - ამას ვინ დაგიჯერებთ, ან გარეთ, ან შიგნით?

ეს ხომ ძირს ნაყარია და ამას არავინ აღარ შეჭამს.

პ.ს. 2004-2012 წლებზე პასუხისმგებელი პირების დიდი უმრავლესობა მთავრობაში გყავთ უმაღლეს თანამდებობებზე. ის ვისაც ოცნებიდან ვაგინებდით, ვაკრიტიკებდით და ახლაც ვაგინებთ, ისევ მანდ არიან არსად არ გაგიშვიათ, პირიქით 2, 3 ან 4 საფეხურით დააწინაურეთ - "ზონდერ გრუპები".

პ.პ.ს. თაროებზე გიდევთ უმძიმესი დანაშაულების საქმეები (ერთხელ უკვე შეგახსენეთ), მტვერი დაედო რითაც უმძიმეს ბრალდებებს წაუყენებდით თქვენს "მტრებს".

კიდევ შეგახსენებთ მალე… მარაზმის პიკშია ქვეყანა," - წერს სოსო გოგაშვილი.

ცნობისათვის, "კანდიდატის თემა იყო ერთგვარი "სათაგური", რომელშიც საქართველოს ხელისუფლებას თავი შეაყოფინეს - კიდევ ერთხელ უნდა ("ნაციონალურ მოძრაობას") ხელი მოგვაწერინონ პოლიტიკურ შეთანხმებაზე, რომლის საფუძველზეც ორი დამნაშავე ციხიდან უნდა გამოვიდეს და ბიძინა ივანიშვილი ქვეყნიდან წავიდეს - უნდათ, კონსტიტუციური წესრიგი მოგვიშალონ და სახელმწიფოებრიობა დაგვაკარგვინონ, რისი დაშვებაც არაფრის ფასად არ შეიძლება," - ამის შესახებ "ქართული ოცნებიდან" წასული დეპუტატების, სოზარ სუბარის, მიხეილ ყაველაშვილის და დიმიტრი ხუნდაძის ერთობლივ განცხადებაშია აღნიშნული.

როგორც დეპუტატები აცხადებენ, ბაკურიანში ოპოზიციის შეკრებაზე რევოლუციისთვის ორი ალტერნატიული სცენარი იყო შემუშავებული - პირველი, ევროპარლამენტის რეზოლუციაზე, ხოლო მეორე, კანდიდატის სტატუსის შესახებ ევროკავშირის გადაწყვეტილებაზე გათვლილი სცენარი და სცენარის მთავარი მიზანი ომის დაწყებაა.