დღე: 6

ღამე: -2

USD 2.6441

EUR 2.8913

"საქართველოს ელჩმა განაცხადა, რომ რუსეთთან ფრენების განახლება არ იგეგმება“ - უკრაინის საგარეო საქმეთა სამინისტრო 25.01.2023 21:20

უკრაინის საგარეო საქმეთა მინისტრის მოადგილემ ევჰენი პერებიინისმა უკრაინაში საქართველოს ელჩს, გიორგი ზაქარაშვილს რუსეთთან პირდაპირი ფრენების შესაძლო აღდგენის გამო შეშფოთება გამოუცხადა.

 

უკრაინის საგარეო საქმეთა სამინისტრო ქვეყნის საგარეო საქმეთა მინისტრის მოადგილის, ევჰენ პერებიინისისა და უკრაინაში საქართველოს ელჩის, გიორგი ზაქარაშვილის შეხვედრის შესახებ ინფორმაციას ავრცელებს.

 

უწყების ცნობით, ევჰენ პერებიინისმა მადლობა გადაუხადა ქართულ მხარეს ქალაქების, კიევის, ლვოვის, ხარკოვის, მიკოლაევისა და გოსტომელისთვის გენერატორების მიწოდებისთვის, ასევე საქართველოში უკრაინელი ბავშვების ჯანმრთელობის გაუმჯობესების პროგრამებისთვის, რომლის გაგრძელება იგეგმება 2023 წელს.

 

„მინისტრის მოადგილემ იმედი გამოთქვა, რომ საქართველო გადახედავს თავის პოზიციას და შეუერთდება იმ პარტნიორთა წრეს, რომლებიც უკრაინას აწვდიან იარაღსა და სამხედრო აღჭურვილობას, ასევე, რომ თბილისი შეუერთდება ევროკავშირის მიერ აგრესორი სახელმწიფოს წინააღმდეგ დაწესებულ ყველა სანქციას. ამ კონტექსტში მან გამოთქვა შეშფოთება საქართველოსა და რუსეთს შორის პირდაპირი საჰაერო მიმოსვლის შესაძლო აღდგენის შესახებ ინფორმაციის გამო. თავის მხრივ, ქართველმა დიპლომატმა დაარწმუნა, რომ საქართველო არ აპირებს რუსეთის ფედერაციასთან ფრენების განახლებას. ევჰენ პერებიინისმა ასევე დააყენა საქართველოში ციხეში მყოფი უკრაინის მოქალაქის, მიხეილ სააკაშვილის ჯანმრთელობის გაუარესების საკითხი და მოუწოდა ქართველ დიპლომატს, განიხილონ მისი სამკურნალოდ უკრაინაში ან მესამე ქვეყნებში გადაყვანის შესაძლებლობა.

 

მხარეებმა განიხილეს ორმხრივი თანამშრომლობის სხვა საკითხები, კერძოდ, უკრაინის პრეზიდენტის ვოლოდიმირ ზელენსკის მიერ ინიცირებული მშვიდობის ფორმულის განხორციელებაში საქართველოს ჩართვის შესაძლებლობა, ასევე დადებითად აღნიშნეს უკრაინულ-ქართული საპარლამენტთაშორისო დიალოგის გააქტიურება“, – ნათქვამია უკრაინის საგარეო საქმეთა სამინისტროს მიერ გავრცელებულ ინფორმაციაში.

 

 

ავტორ(ებ)ი :

ბოლო სიახლეები
 
 
 
 
 
 
 

 

 

 

ასევე დაგაინტერესებთ