21:58 22.11.2020
„მთავარია, მობილობის შემცირება - ჩვენი სტრატეგია იქნება მაქსიმალურად წერტილოვანი შეზღუდვები, ლოკდაუნის გარეშე“

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე თამარ გაბუნია აცხადებს, რომ ხელისუფლების სტრატეგიაა წერტილოვანი შეზღუდვები, ლოკდაუნის გარეშე.

 

 

„არაერთხელ გაცხადდა, რომ ჩვენი სტრატეგია ამ შემთხვევაში იქნება მაქსიმალურად წერტილოვანი შეზღუდვების გზით წასვლა, რადგან მეტად მიზნობრივი რეგულაციები მოგვცემს საშუალებას, შევინარჩუნოთ ეკონომიკური და ბიზნესაქტივობის შესაფერისი დონე და ასევე, შევამციროთ ჯანმრთელობასთან დაკავშირებული რისკები. შეზღუდვების მაგალითები არის ის, რასაც ჩვენ დღეს უკვე ვიყენებთ, თუმცა ყველაზე მნიშვნელოვანი მაინც არის პირად დონეზე, ინდივიდუალურ დონეზე ამ შეზღუდვების ამოქმედება. პირადი დაცვის საშუალებები, ნიღაბი, ფიზიკური დისტანცია და ხელის ჰიგიენა. დანარჩენი ის მენიუ, რომელსაც ევროპის ქვეყნები იყენებენ შეზღუდვების კუთხით, ლოკდაუნის გარეშე, რა თქმა უნდა, ჩვენთვის ცნობილია და შესაფერისად მოხდება მათი გამოყენება იმისდა მიხედვით, თუ სად, როდის და როგორ წარიმართება ეპიდემიური სურათი“, – განაცხადა თამარ გაბუნიამ.

 

მისივე თქმით, საუბარია ლოკალურ, წერტილოვან შეზღუდვებზე, რომლებიც მობილობას შეამცირებს. „ჩვენთვის დღეს, რა თქმა უნდა, მთავარი არის, რომ მობილობა შემცირდეს, რათა სტაბილიზაციას მაინც მივაღწიოთ. შეზღუდვები, რაც გვაქვს, მოდიფიცირება შეიძლება, შეეხოს საათების გახანგრძლივებას, შეზღუდვის დროის გახანგრძლივებას, მგზავრთა ნაკადების მართვას, ესეც სრული შეწყვეტის გარეშე, რათა მაინც შენარჩუნდეს აქტივობის გარკვეული დონე, რაც აუცილებელია ეკონომიკური და ბიზნესსაქმიანობისთვის. დეტალები დაზუსტდება და როგორ კი იქნება ამაზე საბოლოო გადაწყვეტილება, საზოგადოებისთვის გახდება ცნობილი“ – განაცხადა თამარ გაბუნიამ.




ავტორ(ებ)ი : geotimes.ge