2025 წლის 1 ნოემბერს, ადგილობრივი დროით დილით, ჩინეთის პრეზიდენტმა სი ძინპინმა 32-ე APEC-ის ეკონომიკური ლიდერების შეხვედრის გადაბარების ცერემონიაში მიიღო მონაწილეობა და განაცხადა, რომ ჩინეთი 2026 წელს APEC-ის 33-ე ეკონომიკური ლიდერების შეხვედრის მასპინძელი იქნება - შეხვედრა ჩატარდება გუანდუნის პროვინციის ქალაქ შენჟენში.

სი ძინპინმა აღნიშნა, რომ APEC წარმოადგენს აზია-წყნარი ოკეანის რეგიონის ეკონომიკური თანამშრომლობის მთავარ მექანიზმს, რომელმაც მნიშვნელოვანი წვლილი შეიტანა რეგიონში ზრდასა და კეთილდღეობაში. მისი თქმით, აზია-წყნარი ოკეანის ერთიანი თანამეგობრობის ფორმირება არის გრძელვადიანი პროგრესისა და საერთო კეთილდღეობისკენ მიმავალი ერთადერთი გზა და ეს ხედვა რეგიონის ყველა ქვეყნის მიერ გაზიარებულია.

პრეზიდენტმა ხაზი გაუსვა, რომ ჩინეთი, რომელიც უკვე მესამედ უმასპინძლებს APEC-ს, მზად არის ამ შესაძლებლობის გამოყენებით გააძლიეროს თანამშრომლობა ისეთი მიმართულებებით, როგორებიცაა FTAAP-ის განვითარება, რეგიონული დაკავშირებადობა, ციფრული ეკონომიკა და ხელოვნური ინტელექტი, რაც ახალ ენერგიასა და იმპულსს მიანიჭებს რეგიონულ განვითარებას და მეტი სარგებელი მოუტანს აზია-წყნარი ოკეანის ხალხებს.

სი ძინპინმა ასევე აღნიშნა, რომ შენჟენი, რომელიც მხოლოდ რამდენიმე ათწლეულის წინ პატარა მეთევზეების სოფელი იყო, დღეს თანამედროვე საერთაშორისო მეტროპოლიაა და წარმოადგენს ჩინეთის გახსნილობისა და ურთიერთსასარგებლო თანამშრომლობის პოლიტიკის თვალსაჩინო მაგალითს.

„ჩინეთი სიამოვნებით მიესალმება ყველა მხარეს შენჟენში მომავალი წლის შეხვედრაზე, რათა ერთად განვსაზღვროთ აზია-წყნარი ოკეანის განვითარების ახალი მიმართულებები და ავაშენოთ უფრო ნათელი მომავალი რეგიონისთვის," - განაცხადა სი ძინპინმა.

ღონისძიების მონაწილე სხვა ქვეყნების ლიდერებმა მხარი დაუჭირეს ჩინეთის მასპინძლობას 2026 წლის APEC-ისთვის, გაიზიარეს ჩინეთის ხედვა მომავალი შეხვედრის მიზნებთან დაკავშირებით და გამოთქვეს მოლოდინი, რომ „APEC-ის ჩინეთის წელი" წარმატებით შეუწყობს ხელს რეგიონულ თანამშრომლობასა და საერთო განვითარებას.