უნგრეთის პრემიერ-მინისტრი ვიქტორ ორბანი აცხადებს, რომ მისი პოლონელი კოლეგა, დონალდ ტუსკი უნგრეთის ხელისუფლებაზე თავდასხმას განაგრძობს, რისი მიზეზიც საკუთარი პრობლემების გადაფარვაა.

როგორც ორბანი აღნიშნავს, დონალდ ტუსკმა პოლონეთი ბრიუსელის ვასალად აქცია.

„პოლონეთის პრემიერ-მინისტრმა, დონალდ ტუსკმა კიდევ ერთი შეტევა წამოიწყო უნგრეთის წინააღმდეგ. ის ამას იმიტომ აკეთებს, რომ ქვეყნის შიგნით დიდ პრობლემებშია. მისმა პარტიამ საპრეზიდენტო არჩევნები წააგო, მისი მთავრობა არასტაბილურია და ის გამოკითხვებში ჩამორჩება. მანფრედ ვებერთან ერთად, ის ევროპაში ერთ-ერთი ყველაზე ხმამაღალი ომის მომწყობი გახდა. თუმცა ტუსკის საომარი პოლიტიკა წარუმატებელია: უკრაინას ევროპული ფული ელევა და პოლონელი ხალხი ომით დაიღალა. მას არ შეუძლია კურსის შეცვლა, რადგან პოლონეთი ბრიუსელის ვასალად აქცია.

ტუსკი ახლა პანიკაშია, დევნის თავის პოლიტიკურ ოპონენტებს და აკრიტიკებს უნგრეთის მშვიდობის მომხრე პოზიციას, რათა ყურადღება საკუთარი შიდა პრობლემებიდან გადაიტანოს. ეს ძალიან სამწუხაროა.

უნგრეთსა და პოლონეთს შორის ისტორიული მეგობრობა უკეთესს იმსახურებს. მე არ შემიძლია და არც ვაპირებ ომის მოწყობაში ტუსკის მხარდაჭერას. უნგრეთი სხვა გზას მისდევს – მშვიდობის გზას. უნგრელი ხალხი უარს ამბობს ბრიუსელის ვასალად გახდომაზე. დროა, ბატონი ტუსკი ამას შეეგუოს და საკუთარ საქმეს მიხედოს“, – წერს ვიქტორ ორბანი.

ცნობისთვის, 29 ოქტომბერს დონალდ ტუსკმა განაცხადა, რომ ვიქტორ ორბანი მოხიბლულია მოსკოვით და სურს, თავისი ქვეყანა რუსეთის მოდელით ააშენოს. ტუსკის განცხადებით, ორბანის აზროვნება ძალაუფლებას აღიქვამს, როგორც საშუალებას იმის უზრუნველსაყოფად, რომ ვერავინ გააკონტროლოს ხელისუფლების ქმედებები“.