ჩვენი მთავარი მიზანი სამართლიანი მშვიდობა და ომის დასრულებაა, ყველაფერს ვაკეთებთ, რომ დიპლომატიის გზაზე გამარჯვება მოვიპოვოთ, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

ზელენსკიმ მაიამიში უკრაინის დელეგაციის მუშაობის წინასწარი შედეგების შესახებ ანგარიში წარადგინა. მისი თქმით, აშშ-ის წარმომადგენლებთან ერთად ომის დასრულების შესახებ რამდენიმე დოკუმენტი შეათანხმეს. კერძოდ, ეს მოიცავდა უკრაინის მომავალი იურიდიულად სავალდებულო უსაფრთხოების გარანტიებს.

„ჩვენი მთავარი მიზანი სამართლიანი მშვიდობა და ომის დასრულებაა. ამჟამად ომი მიმდინარეობს, მაგრამ ჩვენ ყველაფერს ვაკეთებთ, რომ დიპლომატიის გზით გამარჯვება მოვიპოვოთ. სულ მცირე, დიპლომატიის გზაზე", - განაცხადა ზელენსკიმ.

უკრაინის პრეზიდენტის თქმით, ამჟამად უკრაინის დელეგაცია მაიამიდან ბრუნდება და ხვალ დილით, შეხვედრის შედეგების შესახებ, მეტი დეტალი ეცოდინება.

„ჩემი აზრით, ყველაფერი, რაც შეგვეძლო გაგვეკეთებინა, პირველი დოკუმენტის სამუშაო ვერსია უკვე მზადაა. გეგმის 20 პუნქტი არსებობს. ის ალბათ იდეალური არ არის, მაგრამ გეგმა არსებობს",- აღნიშნა ზელენსკიმ.

ამასთან, ზელენსკის თქმით, უკრაინას, ევროპელებისა და აშშ-ის მიერ შემუშავებულია უსაფრთხოების გარანტიები, ეს ეხება ჩარჩო დოკუმენტს.

„ჩვენსა და აშშ-ის შორის არსებობს ცალკე დოკუმენტი - ორმხრივი უსაფრთხოების გარანტიები. ჩვენი აზრით, ეს უნდა განიხილებოდეს აშშ-ის კონგრესში, ზოგიერთი დეტალი გასაიდუმლოებულია. მე ვნახე პირველი სამუშაო ვერსია. სიმართლე გითხრათ, მათი თითქმის 90% სწორედ ისაა, რაც ჩვენთვის მნიშვნელოვანია - რასაც უნდა ელოდოს ჩვენი არმია და უკრაინა ასეთი გარანტიების ხელმოწერის შემდეგ, თუ რამდენად ძლიერები შეგვიძლია ვიყოთ. და ეს ყველაფერი საკმაოდ იმედისმომცემად გამოიყურება. ეს აჩვენებს, რომ ჩვენ ძალიან ახლოს ვართ რეალურ შედეგთან", - აღნიშნა უკრაინის პრეზიდენტმა.

ამასთან, ზელენსკის თქმით, უკრაინის აღდგენის შესახებ შეთანხმების პირველი პროექტი დასრულებულია.

„ძირითადად, ყველა დოკუმენტის ძირითადი ბლოკი, ჩემი აზრით, მზადაა. არის რაღაცები, რისთვისაც ჩვენ მზად არ ვართ. და არის რაღაცები, რისთვისაც, დარწმუნებული ვარ, რუსები მზად არ არიან. ამერიკელები ამჟამად მოლაპარაკებებს აწარმოებენ მეორე მხარესთან - რუსეთის წარმომადგენლებთან. ისინი ისაუბრებენ და შემდეგ მათგან უკუკავშირს მივიღებთ", - აღნიშნა ზელენსკიმ. უკრაინის პრეზიდენტის თქმით, აშშ ითხოვს, რომ შეუთანხმებელი დოკუმენტების ფორმატების დეტალები ჯერ საჯაროდ არ გაჟღერდეს.