რუსეთის თავდაცვის სამინისტროს ინფორმაციით, ქვეყნის საჰაერო ძალებმა ღამის განმავლობაში 264 უკრაინული უპილოტო საფრენი აპარატი გაანადგურეს.

უწყების ცნობით, უპილოტო საფრენი აპარატები ბელგოროდის, ბრიანსკის, ვორონეჟის, კალუგის, კურსკის, ლიპეცკის, როსტოვის, რიაზანის, სმოლენსკის, ტულის, ულიანოვსკისა და იაროსლავის ოლქებში, კრასნოდარის მხარეში, ყირიმში, თათარსტანში, მოსკოვის ოლქში, ასევე აზოვისა და შავი ზღვების თავზე ჩამოაგდეს.

მოსკოვის მერმა, სერგეი სობიანინმა განაცხადა, რომ ღამით რუსეთის საჰაერო ძალებმა დედაქალაქისკენ მიმავალი 26 დრონი ჩამოაგდეს.

ამასთან, როსტოვის ოლქში უპილოტო საფრენი აპარატის ნამსხვრევების ჩამოვარდნის შედეგად დაზიანდა კერძო სახლები, ხანძარი გაჩნდა საწყობებსა და ერთ-ერთ ადმინისტრაციულ შენობაში. ხანძარი ამ დროისთვის ლოკალიზებულია.

ცნობისთვის, რუსეთის პრეზიდენტის, ვლადიმერ პუტინის მიერ გამარჯვების დღის აღსანიშნავად გამოცხადებული ცეცხლის შეწყვეტის რეჟიმი დღეიდან ამოქმედდა და 10 მაისამდე გაგრძელდება.