ბოჭორიშვილის კლინიკის გენერალური დირექტორი დავით გადელია ეხმაურება სომხეთის ჯანდაცვის მინისტრის განცხადებას, რომ საქართველო მალავს ზუსტ ინფორმაციას კორონავირუსით დაავადებულების შესახებ:

„სკოლის ძმაკაცები ბავშვობიდან ვთამაშობთ ჯოკერს წყვილებში. არასდროს გვითამაშია რამე დამატებით ინტერესზე, არ გვქონია წინასწარ შეთანხმებული ნიშნები (ცინკები), თუმცა ამის მიუხედავად, თამაშის დროს საშინელება ტრიალებს! ცოდვა- მადლის გარჩევა არაა, დედა-შვილს არ აიყვანს კი არა არც გახედავს ისე გავარდება სახლიდან (როგორც ჩვენი ცოლები გარბიან სახლიდან ჩვენი თამაშის და ყაყანის გამო). თითქმის ერთი და იგივე ტექსტებია: "ვაა როგორ გიმართლებს!" "როგორ მოგცა კარტმა (ცხადია, უფრო ვულგარული ფორმით)!" "არ მჯერა, რომ ასე გაგვასწარით- უნდა გადავითვალო, სულ საშენოდ გეშლება!"... როდესაც ამ სიტყვებს ვისმენ (და არა თავად მიწევს თქმა) მეგობრებისგან, სიამოვნებას მანიჭებს მათი წუწუნი და "ტირილი"- ხანდახან ვაქეზენ კიდეც!...

...... რატომ მოვყევი ამდენი, უკვე თითქმის 50 წელს მიმდინარე პროცესზე და ჩემს ემოციურ რეაქციაზე: - ზუსტად ასეთივე სასიამოვნო განცდა მქონდა სომხეთის ჯანდაცვის მინისტრის ტირილ- წუწუნზე - "ჟილკობენ ქართველები, რაღაცას მაიმუნობენ, ვაა როგორ უმართლებთ!" - სიტყვებიც ნაცნობი... მეც იგივეს ვუპასუხებდი, როგორც მეგობრებს ვაქეზებ და ვაბრაზებ: "კი არ გვიმართლებს და ვიტყუებით, მაგრა ვმუშაობთ (იქ- "ვთამაშობთ")! კლასი ცავატანემ! ჩემსას რას ითვლი, შენი ჯოკერები ითვალე!"