„დინამო თბილისმა“ ეროვნული საფეხბურთო ლიგის მე-18 ტურის შეხვედრა მოიგო და საქართველოს ჩემპიონის ტიტულს ისტორიაში მე-18 დაეუფლა.

„დინამო-არენაზე“ გამართულ მატჩში მისი მეტოქე თბილისის „მერანი“ იყო, რომელმაც ლიგაში ადგილი ფინიშამდე სამი ტურით ადრე დაკარგა. მატჩი „დინამოს“ უპირატესობით მიმდინარეობდა და დიდი ანგარიშით გამარჯვებაც ლოგიკური იყო. ანგარიში 25-ე წუთზე ნოდარ ქავთარაძემ პენალტით გახსნა, 42-ე წუთზე თავი გიორგი გაბედავამ გამოიჩინა, რომელმაც 77-ე წუთზე დუბლი გაიფორმა და „დინამომ“ 3:0 მოიგო.