მერაბ ჟორდანია ცნობილი ავსტრიული კლუბის, ვენის „აუსტრიას“ ხელმძღვანელი გახდა – ამის შესახებ ინფრომაციას ავსტრიული გამოცემა wien.orf.at ავრცელებს.

მწვანე შუქი იისფერი პარტნიორისთვის

ვენის „აუსტრიას“ ფინანსური მომავლის გარშემო ნისლი მალე უნდა გაიფანტოს. ახალი პარტნიორის ოფიციალური პრეზენტაცია ჯერ არ მომხდარა. მაგრამ გუნდში განაცხადეს, რომ დაასრულეს მოლაპარაკება, რომელიც დადებითად დასრულდა. ახალ პარტნიორთან დაკავშირებით დეტალები არ გახმაურებულა, მაგრამ ვენის კლუბის დირექტორთა საბჭომ, ადმინისტრაციამ და სამეთვალყურეო საბჭომ მიმდინარე კვირაში გამართულ სხვადასხვა შეხვედრაზე თანამშრომლობის სურვილი ერთხმად დაამტკიცეს. ეს განსაკუთრებით მნიშვნელოვანია იმისთვის, რომ 3 მარტამდე შეძლონ ბუნდესლიგის სალიცენზიო დოკუმენტაციის წარდგენა. ახალი პარტნიორი მომავალ კვირას უნდა წარადგინონ.

გამოსავალი გარე ინვესტორია

გავრცელებული ინფორმაციით, „აუსტრიას“ ახალი პარტნიორი მერაბ ჟორდანია უნდა გახდეს. 55 წლის ფუნქციონერი ერთ დროს თბილისის „დინამოს“ მოთამაშე და საქართველოს ფეხბურთის ფედერაციის პრეზიდენტი იყო.

2010 წლიდან 2013 წლამდე იგი ხელმძღვანელობდა ჰოლანდიურ კლუბს „ვიტესს“. გარდა ამისა, ავსტრიის მეორე დივიზიონში, ლევან ჟორდანიას დამატების შესახებ სატრანსფერო „ფანჯრის“ დახურვამდე ცოტა ხნით ადრე განაცხადეს. ის მერაბ ჟორდანიას 24 წლის შვილია.

„აუსტრიას“ მმართველი საბჭოს წევრმა მარკუს კრეტჩმერმა ბოლო რამდენიმე კვირის განმავლობაში ოპტიმიზმი შეინარჩუნა და კონკრეტული შედეგები გამოაცხადა. მაგრამ მან არ ისურვა კომენტარის გაკეთება მერაბ ჟორდანიას შესახებ და კონტრაქტების გაფორმებამდე მედიას მოთმინება მოსთხოვა.

„ჩვენ მკაფიოდ აღვნიშნეთ, რომ თებერვლის ბოლოს მოლაპარაკებები უნდა დაგვესრულებინა, რადგან ლიცენზირებისთვის დოკუმენტაცია გვჭირდება. მაგრამ თანამშრომლობა უნდა გაგრძელდეს მრავალი წლის განმავლობაში, თუ არა ათწლეულების განმავლობაში“, – განაცხადა მან.

დეკემბრის დასაწყისში „აუსტრიამ“ განაცხადა, რომ გასული წლის განმავლობაში თითქმის 19 მილიონი ევროს ზარალი ნახა. მაშინ ითქვა, რომ გუნდს კრახი თავიდან შეიძლება მხოლოდ გარე ინვესტორმა აარიდოს. თუ ინვესტორი ვერ მოიძებნა და ფინანსური გადარჩენა შეუძლებელია, ავსტრიის საფეხბურთო ასოციაციამ უნდა წარადგინოს მისი გაკოტრების მოთხოვნა. მაგრამ ამ ეტაპზე ეს ვარიანტი აღარ განიხილება.

წყარო: პირველი არხი