19.07.2022 13:14

ანალიტიკოსი დავით ქართველიშვილი სოსო გოგაშვილის დაკავებას სოციალურ ქსელში ეხმაურება:

 

ვინაიდან სოსო გოგაშვილთან დაკავშირებული საზოგადოებრივი ყურადღება დიდია, შემიძლია ჩემს ხელთ არსებული ინფორმაციის მხოლოდ მცირე ნაწილით გავამდიდრო ობიექტურად და ლოგიკურად მის მიმართ არსებული ინტერესი - საიდან მოდიოდა და რა მიზნებით მოხვდა იგი ქვეყნის სპეცსამსახურების მწვერვალზე. ვეცადოთ პატარა ფარდა ავხადოთ იმას, თუ როგორ შეძლო გაუნათლებელმა, შემთხვევითმა, მხოლოდ ვაჭრობასა და გამდიდრებაზე "აცრილმა" ადამიანმა სოციალურად დაუცველის სტატუსიდან 2-3 წელიწადში წარმოუდგენელი გამდიდრება. 

 

სოსო გოგაშვილი - გაუნათლებელი, მდაბიო ადამიანი, რომელიც სიმდიდრის გამო ყველაფერზეა წამსვლელი. მისთვის არ არსებობს სამშობლოს ინტერესი და საიდუმლო ინფორმაცია. ასეთი ხალხისთვის არსებობს მხოლოდ სიმდიდრის სიყვარული. ამიტომ! ძალიან სწრაფად უნდა გაირკვეს, რომელი ქვეყნის სპეცსამსახურებს ამარაგებდა ეს კაცი დიდძალი თანხის სანაცვლოდ ინფორმაციით!!!

 

2002-2003 წ.წ. პირველად შემხვდა ამ ადამიანის სახელი და გვარი. მაშინ ვიყავი სუს-ს ქ.თბილისის ანალიტიკურის უფროსი. ისანი/სამგორის რაი/განყოფილებიდან მოვიდა ცნობა: "ესა და ეს. მუშაობს ნავთლუღის ბაზრის ხორცის სექციის ერთ-ერთ დახლზე. საქმიან ურთიერთობებში შეიმჩნევა შსს-ს ისნის რ/განყოფილების ზონალურ ოპერ ჯონი N-სთან...".

 

დაიწყო კუდ-ის პერიოდი, სადაც ერთი დღე არ მიმუშავია - ეს იყო ჩემი პრინციპული გადაწყვეტილება. "მასზე" აღარაფერი მსმენია, გარდა ღია წყაროებში უკვე 2013 წლის შემდეგ არსებული ინფორმაციებისა:

 

რომ მეუღლესთან ერთად ნაძალადევის (თუ ჩუღურეთის) ერთ-ერთ მაღაზიაში იჯარით აღებული ჰქონდათ ხორცისა და ხილ-ბოსტნეულის დახლები;

 

რომ გადმობირებული იყო კუდ-ის ზონალური ოპერის მიერ;

 

რომ ჩანერგილი იყო ერთ-ერთ მართლმადიდებლურ პატრიოტულ ორგანიზაციაში, რომლის 2011 წლის 26 მაისის სისხლიანი მოვლენების შემდეგ, ყინწვისის მონასტერში გადამალული წევრები, კუდ-ს ჩააბარა საკუთარი ხელით;

 

ამ ყველაფრის შესახებ, ვიმეორებ, შევიტყვე მოგვიანებით ღია წყაროებიდან და მათ უტყუარობაზე თავს რა თქმა უნდა ვერ დავდებ. 

 

დავდებ იმაზე, რაც ვიცი:

 

"დამთავრებული" აქვს წნორის უნივერსიტეტი, თუ არ ვცდები - საერთაშორისო ურთიერთობების ფაკულტეტი;

 

ჯარში ნამსახურები არაა, აქვს თუ არა სამხედრო ბილეთი და რა ჩანაწერია შიგ - არ ვიცი;

 

სუს-ში მოხვედრიდან მოკლე დროში ელვისებური კარიერის დაწყებისთანავე ჯერ დააქვეითა და გაათავისუფლა ყველა, ვინც მამის სახელით მიმართავდა;

 

გენინსპექციაში დაიბარა ყველა, ვინც მისი წარსულით დაინტერესდა - რიგები იდგა ბიჭების. ზოგი დააქვეითა, ზოგი დაითხოვა, ზოგი "გადმოიბირა" სამსახურის შენარჩუნების სანაცვლოდ;

 

თათბირებზე უყვარდა სიგარის გაბოლება კაბინეტში. მლიქვნელებმა "დონ სოსო" შეარქვეს. მოეწონა.

 

ქალიშვილი შსს-ს გენინსპექციაში მოაწყო. მეუღლე - "ნავთობისა და გაზის კორპორაციაში" ერთ-ერთ ყველაზე მაღალანაზღაურებად თანამდებობაზე, სადაც მგონია დღემდე მუშაობს. მაშინ კი შესჩივლა - მანდ მარტომ რა უნდა ვაკეთოო, არავის ვიცნობო. ამიტომ, დაქალებიც დააუსაქმა;

 

გადასამოწმებელია - როგორ, რანაირად დაამთავრა სტუ-ს ბაზაზე სამართალმცოდნეობაში დოქტორანტურა - რა თემებს ამუშავებდა, როგორ "ესწრებოდა" სწავლებას, რომელ უცხო ენაში ჩააბარა გამოცდა და ა. შ.

 

გადასამოწმებელია ინფორმაცია, მისი უშუალო ჩარევა - ბორჯომის მეუფე სერაფიმეს ირგვლივ აგორებულ სკანდალში;

 

გადასამოწმებელია - სუს-დან პროფესიონალების გაშვებისას, გათავისუფლებული ვაკანსიების სავარაუდოდ - გაყიდვის სქემები;

 

გადასამოწმებელია - როგორ ხვდებოდნენ გაუნათლებელი ადამიანები საჯარო სექტორის სხვადასხვა უწყებების თანამდებობებზე მისი რეკომენდაციით ;

 

გადასამოწმებელია - რა მიზნით ჩაუტარა საქართველოს მასშტაბით არსებული მონასტრების ინვენტარიზაცია, მათი მეურნეობისა და მიმაგრებული მიწების აღწერა;

 

გადასამოწმებელია ნოდარ მელაძის მიერ 2017 წელს თავის ჟურნალისტურ გამოძიებაში ჩამოთვლილი მის და მისი ახლობლების სახელებზე გაფორმებული დიდძალი უძრავი და მოძრავის ქონების შეძენის წარმომავლობა;

 

ეს არის სოსო გოგაშვილის "ფსიქოპორტრეტის" მხოლოდ რამდენიმე და ზოგადი შტრიხი, იმედია უფრო სრულყოფილი სურათის შესაქმნელად ჩვენ გამოძიების მსვლელობა დაგვეხმარება!"- წერს დავით ქართველიშვილი.

 

შეგახსენებთ, რომ სუს-ის უფროსის ყოფილ მოადგილეს, სოსო გოგაშვილს აღკვეთი ღონისძიების სახით პატიმრობა შეეფარდა. აღნიშნული გადაწყვეტილება მოსამართლე არსენ კალატოზიშვილმა ბრალდების მხარის შუამდგომლობის საფუძველზე მიიღო.

 

სახელმწიფო უსაფრთხოების სამსახურის თანამშრომლებმა იოსებ გოგაშვილი 16 ივლისს დააკავეს. მას ბრალდება საქართველოს სისხლის სამართლის კოდექსის 333-ე მუხლის პირველი ნაწილით (მოხელის მიერ სამსახურებრივი უფლებამოსილების გადამეტება, რამაც სახელმწიფოს კანონიერი ინტერესის არსებითი დარღვევა გამოიწვია.), 157-ე მუხლის მე-4 ნაწილით (პერსონალური მონაცემების უკანონოდ მოპოვება, შენახვა, გავრცელება, რამაც მნიშვნელოვანი ზიანი გამოიწვია, სამსახურებრივი მდგომარეობის გამოყენებით) და 236 მუხლის მე-3 ნაწილით (ცეცხლსასროლი იარაღისა და საბრძოლო მასალის მართლსაწინააღმდეგო შეძენა და შენახვა) წარედგინა, რაც სასჯელის სახედ და ზომად ითვალისწინებს თავისუფლების აღკვეთას ვადით ოთხიდან შვიდ წლამდე.