"ჯორჯიან თაიმსი" გთავაზობთ „არა მონობის“ ჯგუფში, ერთ-ერთი დასაქმებულის, - ვ.ჯ-ს შეტყობინებიდან ამონარიდს: 

- „დეგუსტოში“ მზარეულად მუშაობა რომ დავიწყე, შეფის მხრიდან აგრესია და უკმაყოფილება წამოვიდა. მომუშავე პერსონალს ასე მიმართავდა: დაიჭირე ეს ტაფა, სანამ შემოგახეთქე, ასევე აგინებდა თანამშრომლებს. მე რადგან ბიჭი ვიყავი, თავიდან ვერ მიბედავდა. შესვენებისთვის განკუთვნილ 1 საათს ვერ ვიყენებდით, მხოლოდ 20 წუთით თუ მოვახერხებდით გასვლას. მენეჯერიც არ გვაკლებდა და თუ რამე არ მოსწონდა გვიყვიროდა, - ხომ არ უბერავთო?“ 

არცთუ ისე დიდი ხნის წინ, სუპერმარკეტების ქსელმა „ფრესკომ“ სასამართლო დავა, სწორედ ამ საკითხზე წააგო. 2017 წლის 7 თებერვალს, „ფრესკოს“ თანამშრომლების სახელით, Facebook გვერდზე „ჟამთასვლა ფოტოსურათებზე“ ავტორმა, გიორგი ლაბაძემ გამოაქვეყნა ინფორმაცია, სადაც ეწერა, რომ „ფრესკოს” თანამშრომლების სამუშაო საათები კვირაში  60 საათს შეადგენს, ხოლო ანაზღაურება მინიმალურია – 400 ლარამდე. პერსონალის მიმართ ჯარიმების რაოდენობაც არაადექვატურია, - 10 ლარიდან 100 ლარამდე მერყეობს. „ფრესკო“აღნიშნული გვერდის ავტორს უჩიოდა  და ითხოვდა საქმიანი რეპუტაციის შემლახველი, ცილისწამების შემცველი ცრუ ინფორმაციის უარყოფას. სასამართლომ მოთხოვნა არ დააკმაყოფილა. „ფრესკოს“2000 ლარიანი ჯარიმა დაეკისრა და  ვიდეოთვალთვალის განხორციელების შეწყვეტა დაევალა, ასევე, მოპოვებული ჩანაწერების სრულად განადგურება, რადგან ყოფილი მომხმარებლების განცხადებით, მხოლოდ ქალბატონების გასახდელ ოთახებში მიმდინარეობდა ვიდეო მონიტორინგი, სადაც მამაკაცებს და ადმინისტრაციის ნებისმიერ წარმომადგენელს ჰქონდა შესვლის უფლება და წვდომა ჩანაწერებზე.

კიდევ ერთი შემთხვევა: თბილისში, კოსტავას ქუჩაზე მდებარე მაღაზია „სპარში“, მომხმარებელსა და მაღაზიის კონსულტანტს შორის სიტყვიერი დაპირისპირება მოხდა, რის შემდეგაც, მომხმარებელმა მაღაზიის თანამშრომელს ფიზიკური დაზიანება მიაყენა. 21 იანვარს, სტუდენტი მათე ჯომიდავა მიყენებული ტრამვის შედეგად გარდაიცვალა. მძიმე მდგომარეობაა ასევე, მშენებლობაზე, მაღაროებში და სხვა რთულად შესასრულებელ სამუშაოებზე დასაქმებულთა მხრივაც, სადაც, კვირა არ გავა, ვინმე არ ემსხვერპლოს! 

საქართველოს შრომის კოდექსის თანახმად, დამსაქმებელი ვალდებულია უზრუნველყოს დასაქმებული სიცოცხლისა და ჯანმრთელობისათვის მაქსიამალურად უსაფრთხო სამუშაო გარემოთი. ამავე კოდექსით, გამოსაცდელი ვადა, ე.წ. „სტაჟირებაც“ ანაზღაურებადია, რაც, ძირითადად, არ სრულდება. და ბოლოს, იმისათვის, რომ თავიდან ავიცილოთ შრომის უსაფრთხოებით გამოწვეული რისკები, აუცილებელია, მუშაობის დაწყებამდე, დამსაქმებელს მოვთხოვოთ ხელშეკრულება, კარგად გავეცნოთ ჩვენს უფლებებს და მხოლოდ ამის შემდეგ დავთანხმდეთ მუშაობაზე. 

თამარ ტოჩილაშვილი, 

"ჯორჯიან თაიმსი"