საქართველოს პარლამენტის საგარეო ურთიერთობათა კომიტეტის თავმჯდომარემ, ირაკლი ბერაიამ აშშ-ის ელჩთან საქართველოში, კელი დეგნანთან გაცნობითი ხასიათის შეხვედრა, დისტანციურ რეჟიმში გამართა. მხარეებმა, საქართველოში კოვიდ19 - ის კუთხით არსებული ვითარება განიხილეს. ისაუბრეს საქართველოსა და აშშ-ს შორის თანამშრომლობის ძირითად მიმართულებებზე და მნიშვნელობაზე, საქართველოს ოკუპირებულ რეგიონებში არსებულ ვითარებაზე, უკანონო ქმედებებზე და ჰიბრიდულ კამპანიაზე, მათ შორის დეზინფორმაციასა და პროპაგანდაზე, რომელსაც საოკუპაციო ძალა გლობალური პანდემიის პირობებშიც აგრძელებს, აგრეთვე საქართველოს ევროპული და ევროატლანტიკური ინტეგრაციის გზაზე მიღწეულ პროგრესზე. შეხვედრისას ასევე განიხილეს 2020 წლის საპარლამენტო არჩევნებთან დაკავშირებული საკითხები.

"ამერიკის შეერთებული შტატები საქართველოს მთავარი სტრატეგიული პარტნიორი და მოკავშირეა. ორ ქვეყანას შორის ურთიერთობების მასშტაბებმა და ხარისხმა მიაღწია ყველა დროის მაქსიმუმს. საქართველოს აქვს ამერიკელი პარტნიორების ორპარტიული მხარდაჭერა, რასაც ადასტურებს კონგრესის წარმომადგენელთა პალატის მიერ მიღებული საქართველოს მხარდაჭერის აქტი, ყოველწლიურად მიღებული ბიუჯეტის და ეროვნული თავდაცვის ავტორიზაციის კანონები, აგრეთვე არაერთი სხვა დოკუმენტი. მჭიდროდ ვთანამშრომლობთ აშშ-საქართველოს სტრატეგიული პარტნიორობის ქარტიით განსაზღვრული მიმართულებებით, როგორებიცაა მათ შორის, დემოკრატია და მმართველობა, თავდაცვა და უსაფრთხოება, ეკონომიკა, ხალხთა შორის ურთიერთობები და კულტურული გაცვლები. აშშ მტკიცედ უჭერს მხარს საქართველოს სუვერენიტეტს და ტერიტორიულ მთლიანობას, ევროპულ და ევროატლანტიკურ ინტეგრაციას. ჩვენთვის განსაკუთრებით მნიშვნელოვანი და პრიორიტეტულია ჩვენს მთავარ სტრატეგიულ პარტნიორთან თანამშრომლობის შემდგომი განმტკიცება“, - აღნიშნა ირაკლი ბერაიამ.