გრივერ ფარულავა გარდაიცვალა, ცნობილი ფილოლოგი და ძველი ქართული მწერლობის მკვლევარი. იგი ბოლო დროს თბილისის სასულიერო აკადემიაში ქართული ენისა და ლიტერატურის კათედრის გამგე იყო. 2018 წელს პრეზიდენტმა გრივერ ფარულავას ღირსების ორდენით დააჯილდოვა – „სახელმწიფო ენის შენარჩუნების, ენის, როგორც უწყვეტი სააზროვნო პროცესის ჩამოყალიბებისა და ეროვნული იდენტობის შენარჩნების ხელშეწყობისთვის“.

ფილოლოგი ნინო ჯაფარიძე ემოციური და სევდიანი პოსტით იხსენებს ღირსეულ პიროვნებას და საყვარელ მასწავლებელს:

ყველაზე ტკივილიანი შეხვედრაც ამოტივტივდა ბატონ გრივერთან.... მგონი 2006 წელი იყო... უნივერსიტეტის პროფესორები, რომ ჩაკეტეს სააქტო დარბაზში... დილით, სამსახურში მისულმა ტელევიზიით შევიტყვე მათი ამბავი... ბევრს მეხვეწნენ თანამშრომლები , არ წავსულიყავი, მაგრამ სხვაგვარად არ შემეძლო და სირბილით ავვარდი პირველ კორპუსში... კარები უკვე გაეღოთ და შეურაცხყოფისაგან გაოგნებული ჩვენი მხცოვანი პროფესორები ერთმანეთს ეხმარებოდნენ გადაადგილებაში... უცებ პირველ და მეორე კორპუსს შორის თვალი მოვკარი ბატონ გრივერს, რეზო სირაძეს, ლაურა გრიგოლაშვილს და გია ალიბეგაშვილს, გია ჩვეული მზრუნველობით ამხნევებდა პირველ რიგში, ბატონ რეზოს და რა თქმა უნდა, სხვებსაც...ახლაც თვალწინ მიდგას , როგორი სისათუთით იყრდნობდა ბატონი რეზოს ხელს... ( გიას და ბატონი რეზოს ურთიერთობა სხვა თემაა).