20:50 16.09.2020
„მორიგი პიარ-ავანტიურა „დაავალე მიშას“ მალე ჩაფლავდება“
ზაალ ანჯაფარიძის პოსტი:

“ნაცების“ მორიგი პიარ-ავანტიურა „დაავალე მიშას“ რომ მალე ჩაფლავდება, ამაში საზოგადოება სულ რაღაც თვენახევარში დარწმუნდება, შეიძლება უფრო ადრეც. რატომ? იმიტომ რომ „ნაცები“ და სააკაშვილი არ იცვლებიან. ისევე როგორც ადრე, როცა ხელისუფლებაში იყვნენ, ახლაც ხალხი ჰგონიათ ბნელი და გაუნათლებელი „ბიომასა“ (როგორც მათი იდეოლოგები უწოდებდნენ), რომელიც დაიჯერებს მიშას მორიგ ბლეფს თუნდაც რთველთან მიმართებაში. მშრალი სტატისტიკა რომ მოვიყვანოთ, თუ „ნაცმოძის“ მმართველობის დროს ექსპორტზე გავიდა ჯამში 429.2 მილიონი დოლარის ღვინო, 2013-2020 წლის ივლისის ჩათვლით 1 მილიარდ 216 მილიონი დოლარის ღვინო, ანუ 3-ჯერ მეტი. 2012 წელს არსებული 35 ათასი ჰექტარიდან, 2019 წლისთვის 55 ათას ჰექტრამდე გაიზარდა ვენხების ფართობი. შესაბამისად, გადამუშავებული ყურძენის რაოდენობა და მოსავალი 52,000 (2012)-დან 272,000-ტონამდე (2019).
და ბოლოს, ეს სტატიაც წაიკითხეთ, მეხსიერების გასაღვიძებლად!

კახელ გლეხებს ხელისუფლებამ მუქარა ჯერ კიდევ რთვლის დაწყებამდე შემოუთვალა. ამის მიუხედავად, გურჯაანელმა გლეხებმა ვაზის მასობრივად გაჩეხვა დაიწყეს. მიზეზი ყურძენზე დაწესებული ფასები გახდა, რომელიც, როგორც კახელები ამბობენ, ერთი კილოგრამი ყურძნის თვითღირებულებასაც ვერ ფარავს. ამ ფაქტს სოფლის მეურნეობის სამინისტროში მშვიდად შეხვდნენ.

„ჩივილის მაგივრად გლეხებს ურჩევნიათ, რომ ყურძენი ჩაწურონ, გადაყრას რას გამორჩებიან? იმათ კი, ვისაც მიტინგები და დემონსტრაციები სურთ გამართონ და სკანდალის მოწყობას შეეცდებიან, მინდა ვუთხრა, რომ ამას არავის ვურჩევ. ყველა ასეთი ადამიანი გაიშიფრება და დაისჯება," - ასეთი მუქარა კახელ გლეხებს რთვლის დაწყებამდე სოფლის მეურნეობის მინისტრმა პეტრე ცისკარიშვილმა შეუთვალა. მინისტრის ამ განცხადებას გურჯაანის რაიონში სპეცრაზმის მობილიზება მოჰყვა. მოგვიანებით კი მთავრობამ დანაპირები შეასრულა და სოფელ ველისციხეში მშვიდობიანი მოქალაქეები დაარბია. თუმცა ამ ამბავს სოფლის მეურნეობის სამინისტროს რთვლის ორგანიზებულად ჩატარებისთვის შექმნილ შტაბში სკანდალური განმარტება მოჰყვა. „გლეხებმა დამპალი ყურძნის მაღალ ფასად ჩაბარება მოითხოვეს. სინამდვილეში კი მოსავალს ან შეწამვლა დააკლდა, ან ამინდმა დააზიანა. გლეხს ეს არ აინტერესებს და ხელისუფლებას ადანაშაულებს. ასეთი ადამიანები ნამდვილად უნდა დაისაჯონ," - ასეთი შეფასება მისცა ველისციხეში მომხდარ ინციდენტს ადგილობრივი მედიისთვის მიცემულ ინტერვიუში შტაბის ხელმძღვანელმა აკაკი სიხარულიძემ.

საპროტესტო აქციებისა და გზების გადაკეტვის ნაცვლად, კახელმა გლეხებმა პროტესტის უკიდურეს ზომებს მიმართეს. გურჯაანელმა ავთო ყალაბეგაშვილმა ახლად გაშენებული ნახევარი ჰექტარი საფერავის ჯიშის ვაზი ცრემლებით და ხელის კანკალით მთლიანად გაჩეხა. „ჩემს ოჯახს ვერ ვუვლიდი ისე, როგორც ამ ვაზს. შვილივით ვეფერებოდი და ველაპარაკებოდი, მაგრამ ამ გადაწყვეტილებამდე ხელისუფლებამ მიმიყვანა. კილოგრამ საფერავს 40 თეთრი დაადეს და მისი გადახდაც ენანებათ. ქარხანაში მითხრეს, ნაწილს მაისში გაგისტუმრებთო. ავდგები, ბალახს დავთეს და ტუკებად გავყიდი. მას უფრო ფასი აქვს," - ამბობს ავთო ყალაბეგაშვილი. იგი ერთადერთი გლეხი არ არის, რომელმაც კახეთში ვაზი ამოძირკვა. პროტესტის ასეთი ფორმით ხელისუფლებას ახაშნელებიც ემუქრებიან. „სააკაშვილის მთავრობა ზუსტად იმას აკეთებს, რაც საუკუნეების წინ შაჰ-აბასმა დაგვმართა. ხელისუფლებამ ცარიელი სიტყვებით მაინც დაგვაიმედოს, ტელევიზიით კახელი გლეხისათვის შეურაცხმყოფელ კლიპებს რომ აჩვენებენ. ცისკარიშვილმა იცის, რა არის ვაზი, როგორ უნდა მას მოვლა და ჩვენ არა? ამ კლიპების გადაღებაში დახარჯული თანხით მთავრობას კახელი გლეხის პრობლემის მოგვარება ერჩია," - ამბობს ახაშენელი გია გაგნიძე.

საგულისხმოა, რომ შარშანდელთან შედარებით წელს კახეთში ყურძნის უხვი მოსავალია. ფასები კი, როგორც გლეხები ამბობენ, საგრძნობლად დაბალია. ერთი კილოგრამი რქაწითელის ღირებულება 19-20 თეთრს, ხოლო საფერავის ფასი 40 თეთრს არ აღემატება. ქართველ მეღვინეთა განცხადებით, ყურძენზე ფასის დაცემა რუსეთის მიერ დაწესებულმა ემბარგომ გამოიწვია. ქარხნებს შარშან წარმოებული ღვინის რეალიზება ვერ მოუხდენიათ, ისინი მხოლოდ საკუთარ ვენახებს კრეფენ და წლის მარაგს ამით ავსებენ. კახელი გლეხის უკიდურეს ზომამდე მიყვანას გუშინვე „კონსერვატორები“ გამოეხმაურნენ და მომხდარში ხელისუფლება დაადანაშაულეს. რთვლის ორგანიზებულად ჩატარებისათვის შექმნილ სპეციალურ შტაბში კი მისმა ხელმძღვანელმა აკაკი სიხარულიძემ ასეთი კომენტარი გააკეთა: „ეს ჩვენი პრობლემა არ არის. ვისაც ვენახის გაჩეხვა უნდა, გაჩეხოს!"

 


„24 საათი“,

28 სექტემბერი, 2007 




ავტორ(ებ)ი : geotimes.ge