როგორც ფინანსთა მინისტრმა ივანე მაჭავარიანმა განაცხადა, აზიის განვითარების ბანკი (ADB) 54-ე წლიურ შეხვედრას საქართველოში გამართავს. მისივე განმარტებით, მათი მხრიდან ამ ღონისძიების საქართველოში გამართვის გადაწყვეტილება მიუთითებს ქვეყნის მიერ განხორციელებული ანტიკრიზისული გეგმისა და პოსტპანდემიური სტრატეგიის ეფექტურობაზე. აღნიშნულ ღონისძიებაში მონაწილეობას 5 ათასზე მეტი მაღალი რანგის სტუმარი იღებს, მათ შორის ბანკის წევრი ქვეყნების ფინანსთა მინისტრები და ეროვნული ბანკის პრეზიდენტები, რაც ხაზს უსვამს მის მნიშვნელობას. ხოლო თუ მხედველობაში მივიღევთ, რომ ADB ჩვენი ქვეყნის ერთ-ერთი მსხვილი ინვესტორია, ეს მოვლენა კიდევ ერთ დატვირთვას იძენს. კერძოდ, ღონისძიების საქართველოში ჩატარება საერთაშორისო ინვესტორებისთვის იქნება გზავნილი, უფრო აქტიურად ჩადონ ინვესტიციები ჩვენი ქვეყნის ეკონომიკაში. მნიშვნელოვან ნიუანსს წარმოადგენს ის ფაქტიც, რომ ADB-ის 53-ე წლიურ შეხვედრაზე ივანე მაჭავარიანი აზიის განვითარების ბანკის მმართველთა საბჭოს თავმჯდომარედ აირჩიეს.