"ერთიანი ნაციონალური მოძრაობის" პოლიტიკური საბჭოს წევრი დიმიტრი შაშკინი მიიჩნევს, რომ ბოლნისის, დმანისის, წალკისა და თეთრიწყაროს საარჩევნო ოლქში საარჩევნო ბანდა მოქმედებს, რომელსაც გიორგი მეშველიანის ძმა პირადად ხელმძღვანელობს.
როგორც დიმიტრი შაშკინმა „ჯორჯიან თაიმსთან“ განაცხადა, აღნიშნული ბანდა სექტემბრიდან მოყოლებული სცემს ხალხს, აშინებს და შეურაცხყოფას აყენებს.
„ეს არაა პირველი შემთხვევა და არც ბოლო იქნება. ეს ყველაფერი დმანისიდან დაიწყო, როდესაც 12-მა კაცმა ქუჩაში, დღისით სცემა კახა ოქრიაშვილის საარჩევნო შტაბის წევრი. ამის კადრები არსებობს. შემდეგ ძალადობა წალკაში გაგრძელდა, ერთ-ერთი აქტივისტი სცემეს. მერე გადავიდა ბოლნისში, 25 -მა კაცმა ჩაიხანაში არიფ უსუფოვი სცემა. ეს კაცი კი დაიჭირეს, იმიტომ, რომ სცემეს,“- განაცხადა დიმიტრი შაშკინმა.
მისი თქმით, ეს ბანდა ბილბორდებს სპეციალური ტექნიკით ჭრის.
„პლაკატების ჩამოხევა მინახია, მაგრამ ბილბორდების მოჭრა და მოპარვა - არა. ახლა ახალ ზომებზე გადავიდნენ და უკვე ისვრიან. 6-ჯერ ისროლეს, ერთხელ გაარტყეს მანქანას, ორჯერ დაეჯახნენ და ღამით აზერბაიჯანელი წარმოშობის მასწავლებელი სცემეს, ერთ-ერთ სოფელში. ჩვეულებრივ მასწავლებელი გაიგდეს და სცემეს, რომელმაც საჩივარი შეიტანა პოლიციაში. ეს არის ჩვეულებრივი ორგანიზებული ბანდა. იმის მაგივრად რომ გოგი მეშველიანმა მიხედოს რაიონსა და დაეხმაროს აქ მცხოვრებლებს, ის ამ ხალხს სცემს,“- განაცხადა დიმიტრი შაშკინმა.
ავტორ(ებ)ი : Geotimes.com.ge