არჩევნებისათვის ქვეყნის ჩაკეტვა კარგი იქნება თუა არა, ამაზე დისკუსიის გამართვა საჭიროდ არ მიმაჩნია - ამგვარი კომენტარი გააკეთა ნაციონალური მოძრაობის ერთ-ერთმა ლიდერმა რომან გოცირიძემ რადიო „ჯორჯიან თაიმსთან“ „ევროპული საქართველოს“ მაჟორიტარობის კანდიდატის გიგა ბოკერიას განცხადებაზე იმასთან დაკავშირებით, რომ „ქართული ოცნება“ 2 ნოემბრიდან გეგმავს ქვეყნის სრული ჩაკეტვის შესახებ განაცხადოს. ეს უკანასკნელი „ქართული ოცნებისა“ და „ნაციონალური მოძრაობის“ წარმომადგენლებს დებატებში მონაწილეობის და ამ თემაზე სერიოზული დისკუსიის გამართვისკენ მოუწოდებს.
„არავის აქვს ილუზია, რომ პირველ ტურით, პროპორციული სიებით გახდება ცნობილი მანდატების გადანაწილების საკითხი. ფაქტია, რომ ბევრგან მეორე ტური ჩატარდება და ამ პერიოდში „ჩაკეტვა“ ნიშნავს, რომ ქმედება მიმართულია მეორე ტურის საწინააღმდეგოდ,“ - განაცხადა რომან გოცირიძემ.
მისი თქმით, გაუგებარია რა გვაქვს სადისკუსიო მაშინ, როცა ხელისუფლება ცდილობს პანდემიის თავის თავზე მორგებას. „ხელისუფლებას არაფერი გაუკეთებია იმისათვის, რომ თუნდაც პროპაგანდით შებრძოლებოდა პანდემიას და ახლა ცდილობს ის სათავისოდ გამოიყენოს, მაგრამ ჩვენ ამას არ დავუშვებთ,“ - განაცხადა გოცირიძემ.
ავტორ(ებ)ი : geotimes.ge