ევროკავშირმა კოვიდ 19-ის საწინააღმდეგო კანდიდატი ვაქცინის შეძენის მიზნით ამერიკულ კომპანია Moderna-სთან შეთანხმებას მიაღწია, - ამის შესახებ ევროკომისიის პრეზიდენტმა ურსულა ფონ დერ ლეიენმა დღეს განაცხადა.

„მოხარული ვარ, განვაცხადო, რომ კოვიდ-19-ის ვაქცინასთან დაკავშირებით ხვალ ახალ კონტრაქტს გავაფორმებთ,” - განაცხადა ურსულა ფონ დერ ლეიენმა.

მისივე თქმით, შეთანხმება ევროკავშირს Moderna-ს მიერ შექმნილი ვაქცინის 160 მილიონამდე დოზის შეძენის შესაძლებლობას აძლევს.

შეგახსენებთ, გასულ კვირას კომპანია Moderna-მ განაცხადა, რომ მის მიერ შექმნილ ექსპერიმენტულ ვაქცინაზე ჩატარებული კლინიკური ცდის შუალედურმა შედეგმა აჩვენა, რომ პრეპარატი კოვიდ 19-ის პრევენციის კუთხით 94.5%-ით ეფექტურია.