საქართველოს საკალათბურთო ეროვნული ნაკრები ფინეთში გაემგზავრა, სადაც ევრობასკეტ 2022-ის საკვალიფიკციო ტურნირის 2 მატჩს გამართავს. კალათბურთის ფედერაციის ინფორმაციით, ილიას ზუროსის გაწვრთნილი გუნდი 28 ნოემბერს მასპინძელ ფინეთს დაუპირისპირდება, ხოლო 30-ში შვეიცარიას ეთამაშება. ეს გახლავთ ფიბა-ს მიერ კოვიდ-პანდემიის გამო შეცვლილი ფორმატი, რაც ერთი შესარჩევი ჯგუფის მთლიანი ფანჯრის თამაშების ერთ ქვეყანაში, კონკრეტულად კი ერთ დარბაზში ჩატარებას გულისხმობს.

საქართველოს ნაკრები თბილისიდან სუპერლიგაში მოთამაშე 8 კალათბურთელით გაემგზავრა. ესენი არიან: მერაბ ბოქოლიშვილი, საბა ლობჯანიძე, გივი ბაქრაძე, ლუკა ზაქრაძე, ბექა ბექაური, ალექსანდრე ფევაძე, ლუკა ბულაშვილი და ილია ლონდარიძე. 

ნაკრებს ფინეთის დედაქალაქის აეროპორტში დახვდა ნატურალიზებული ამერიკელი მოთამაშე, თად მაკფადენი, ხოლო სასტუმროში – გიორგი შერმადინი. ჰელსინკიში ჩავიდნენ ნაკრების მთავარი მწვრთნელი და მისი ასისტენტი – ილიას ზუროსი და გიორგიოს ლიმნიატისი, ასევე საფრანგეთში მოთამაშე გიორგი კორსანტია და გიორგი ტურძილაძე. ეროვნულ გუნდს 27 ნოემბერს თორნიკე შენგელია შეუერთდება.