23:47 06.02.2021
ვაჟა სირაძე - კანონს ვინც დაარღვევს, სამართლებრივი ზომები იქნება მიღებული ყველა ფაქტზე, ასევე, წინაზეც

საპატრულო პოლიციის დეპარტამენტის უფროსის ვაჟა სირაძის განცხადებით, აქციის მონაწილეების მიმართ, ვინც კანონს არღვევს, სამართლებრივი ზომები იქნება გამოყენებული. როგორც სირაძემ აღნიშნა, კანონის წინაშე ყველა თანასწორია.

 

„სამართლებრივი ზომები მიღებული იქნება ყველა ფაქტზე, როგორც წინაზე. კანონს ვინც დაარღვევს, შესაბამის ზომებს მივიღებთ. კანონის წინაშე ყველა არის თანასწორი“, - განაცხადა სირაძემ „მთავარ არხთან“ საუბრისას.

 

ცნობისთვის, რუსთაველის გამზირიდან, სამოქალაქო აქტივისტები “დაუმორჩილებლობის მარშის” ფარგლებში თბილისის სხვადასხვა ქუჩაზე მსვლელობას მართავენ. აქციის მონაწილეები მსვლელობის მარშრუტს არ აზუსტებენ.

 

შეგახსენებთ, რომ აქტივისტები 21:00 საათიდან, ე.წ. „კომენდანტის საათის“ დროს “დაუმორჩილებლობის ბრჭყვიალა მარშს“ აწყობენ. მათი მთავარი მოთხოვნა „კომენდანტის საათის” გაუქმება და არსებული რეგულაციების მოხსნაა. სამოქალაქო აქტივისტებს შეუერთდნენ ბიზნეს სექტორის წარმომადგენლები და პოლიტიკოსები.




ავტორ(ებ)ი : geotimes.ge