როგორც ცნობილია, საქართველოში გასული წლის მიწურულს, ექს-პრეზიდენტ სააკაშვილის ყოფილი დაცვის წევრ მიხეილ ბატურინთან ერთად, დაკავებული იქნა ორი უკრაინელი მეზღვაური - იური ხომიჩი და ვლადიმერ დიაჩენკო. მას შემდეგ, კიევში პერმანენტულად, საქართველოს საელჩოს წინ, იმართებოდა ამ მეზღვაურების ახლობლების საპროტესტო აქციები მათი დაუყოვნებლივ განთავისუფლების მოთხოვნით. ამჯერად ამ პროტესტების გეოგრაფია გაფართოვდა და დღეს უკრაინელი მესაზღვრეების ცოლებისა და ოჯახის წევრთა აქცია უნდა ჩატარებულიყო ოდესაში, საქართველოს საკონსულოს შენობის წინ. ამ პროტესტის გასაშუქებლად, ოდესაში საკონსულოს შენობასთან მივიდა კერძო სატელევიზიო "მეშვიდე არხის" გადამღები ჯგუფი, რა დროს ადგილი ჰქონდა მეტად სახალისო ინციდენტს. გადამღები ჯგუფის წევრები, შევიდნენ რა დასასვენებლად საკონსულოს შენობაში მოქალაქეთა მისაღებ ოთახში, განთავსდნენ სავარძლებში, იკითხეს ყავა და საკონსულოს გაოცებული თანამშრომლების კითხვას (რომლებმაც შეამჩნიეს, რომ მათ წინაშე არ იყვნენ საქართველოს მოქალაქეები): ვინ ბრძანდებით და რა გინდათ - უპასუხეს, რომ გამოგზავნილები არიან მიხეილ სააკაშვილის მიერ აქციის გასაშუქებლად. კონსულის ახსნა-განმარტების შემდგომ, რომ სააკაშვილის შემდეგ ქვეყანას რიგით უკვე მეორე პრეზიდენტი ჰყავს სათავეში და რა კავშირშია უკრაინის მოქალაქე უცხო ქვეყნის საკონსულოსთან მიმართებით განკარგულებების გაცემასთან, ტელებრიგადა მიხვდა დაშვებულ შეცდომას და სასწრაფოდ დატოვა საქართველოს იურისდიქციის ქვეშ მყოფი შენობა. ამით კიდევ ერთხელ დაიმსხვრა მითი, რომ სააკაშვილი არ ერევა უცხო ქვეყნის საქმიანობაში - არა მარტო ერევა, არამედ საქართველოს წინააღმდეგ საპროტესტო აქციების უშუალო ორგანიზატორია უკვე ორივე ქვეყნის ტერიტორიაზე.

შეგახსენებთ, რომ  საქართველოს მოქალაქე იური ბატურინი, უკრაინის მოქალაქეები იური ხომიჩი და ვლადიმერ დიაჩენკო 2020 წლის 28 ნოემბერს ხომალდით თურქეთის რესპუბლიკიდან შემოვიდნენ საქართველოს ტერიტორიულ წყლებში. ისინი ბათუმის თვალთახედვის არეში გაჩერდნენ, რა დროსაც სანაპირო დაცვის პოლიციამ შენიშნა და მათი ვინაობა გადაამოწმა. ხომალდის ეკიპაჟი არ გამოვიდა კავშირზე და ისევ თურქეთის ტერიტორიული წყლებისკენ გაემართა, რა დროსაც ისინი დააკავეს. პროკურორმა ვლადიმერ თურმანიძემ დღეს განაცხადა, რომ დაკავებულები ცდილობდნენ შემთხვევის ადგილიდან გაქცეულიყვნენ და საქართველოს სანაპირო დაცვის თანამშრომლებს წინააღმდეგობა გაუწიეს: „მაშინ, როცა სანაპირო დაცვის თანამშრომლები მივიდნენ, გადაჭრეს თოკი და ბაგირი, არ გამოდიოდნენ კავშირზე. მათ არ დაიცვეს წესი, რომლითაც ვალდებულნი იყვნენ სანავიგაციო სისტემები გამოეყენებინათ, რადიოკავშირი დაემყარებინათ, შეტყობინება გაეგზავნათ და ნებართვა აეღოთ,“ - თქვა პროკურორმა.