ევროპის საბჭოს საპარლამენტო ასამბლეის (PACE) თანამომხსენებლები საქართველოს მონიტორინგის საკითხებში, ტიტუს კორლატეანი (რუმინეთი) და კლოდ კერნი (საფრანგეთი), რომლებიც 1-3 ივნისს საქართველოში იმყოფებოდნენ, მიესალმებიან საქართველოში ევროპული საბჭოს პრეზიდენტის შარლ მიშელის შუამავლობით მიღწეულ შეთანხმებას რომელზეც ხელი საქართველოში პოლიტიკური ძალების უმეტესობამ მოაწერა, - ამის შესახებ ნათქვამია ევროპის საბჭოს საპარლამენტო ასამბლეის მიერ გავრცელებულ ინფორმაციაში.

„შეთანხმება მოიცავს რამდენიმე მნიშვნელოვან სფეროს, რომელსაც ჩვენ ყურადღებით ვაკვირდებით საპარლამენტო ასამბლეის მონიტორინგის პროცედურის ფარგლებში. სრულად და კეთილსინდისიერად შესრულების შემთხვევაში, ამ შეთანხმებას შეუძლია, ქვეყნის დემოკრატიულ კონსოლიდაციაში წინ გადადგმული მნიშვნელოვანი ნაბიჯი გახდეს. სწორედ ამის გამო, ყველა პარტია უნდა შეუერთდეს ამ შეთანხმების შესრულების ძალისხმევას. მათ, ვისაც ეს არ გაუკეთებია, ხელი დაუყოვნებლივ უნდა მოაწერონ. საქართველო გზაჯვარედინზე დგას. მოვუწოდებთ ყველა პოლიტიკურ ძალას და დაინტერესებულ მხარეს, ეროვნული ინტერესი და ქვეყნის ევროატლანტიკური ინტეგრაციის პროექტი საკუთარ პარტიულ და პირად ინტერესებსა და სტრატეგიებზე მაღლა დააყენონ“, – ნათქვამია ტიტუს კორლატეანის და კლოდ კერნის განცხადებაში.

ევროპის საბჭოს საპარლამენტო ასამბლეის მომხსენებლებმა ხაზი გაუსვეს მიუკერძოებელი და ჭეშმარიტად დამოუკიდებელი სასამართლო სისტემის მნიშვნელობას, რომელსაც საქართველოს მოქალაქეების სრული ნდობა ექნება. მიესალმნენ რა სასამართლო სისტემის რეფორმირებაში მნიშვნელოვან პროგრესს, მომხსენებლებმა ხელისუფლებას მოუწოდეს, უზრუნველყოს, რომ სასამართლო რეფორმის მესამე და მეოთხე ტალღების შეთანხმებული შეფასება დაეფუძნოს ნამდვილად ინკლუზიურ პროცესს, ყველა შესაბამისი დაინტერესებული მხარის, მათ შორის სამოქალაქო საზოგადოების, ჩართულობით. მომხსენებლებმა ხაზი გაუსვეს, რომ შეფასების პროცესი არის ასევე მნიშვნელოვანი შესაძლებლობა სასამართლო სისტემასთან დაკავშირებით ვენეციის კომისიის დარჩენილი შეუსრულებელი რეკომენდაციების შესასრულებლად. განსაკუთრებით იუსტიციის უმაღლეს საბჭოსთან დაკავშირებით, რომლის ფუნქციონირება და მის მიმართ საზოგადოებრივი ნდობის დაბალი დონე ნამდვილად დამოუკიდებელი სასამართლო სისტემისთვის დაბრკოლებად რჩება და წარმოადგენს შეშფოთების სერიოზულ მიზეზს.

„ამ მხრივ ჩვენ არ შეგვიძლია, ხაზი არ გავუსვათ იუსტიციის უმაღლეს საბჭოში არამოსამართლე წევრების პოზიციებზე სწორად შერჩევის პროცესის მნიშვნელობას. მოვუწოდებთ საქართველოს პარლამენტს, უზრუნველყოს, რომ ყველა ეს კანდიდატი შერჩეული იყოს ინკლუზიური, გამჭვირვალე, კონსენსუსზე და დამსახურებაზე დაფუძნებული შერჩევის პროცესის გზით. უზრუნველყოს, რომ ამ პირებს ჰქონდეთ რაც შეიძლება ფართო მხარდაჭერა დაინტერესებულ მხარეებსა და პოლიტიკურ ძალებს შორის. ეს არის არსებითი ამ მნიშვნელოვანი სასამართლო ინსტიტუტის ლეგიტიმურობისა და მისდამი საზოგადოებრივი ნდობისთვის“, – განაცხადეს თანამომხსენებლებმა.

უზენაესი სასამართლოს მოსამართლეების არჩევასთან დაკავშირებით, მომხსენებლები მიესალმნენ, რომ ვენეციის კომისიის პრაქტიკულად ყველა რეკომენდაცია შერჩევის პროცესთან დაკავშირებით მიღებულია საქართველოს პარლამენტის მიერ. ამასთან, მათ სინანული გამოთქვეს იმასთან დაკავშირებით, რომ შერჩევის პროცესი დაიწყო ამ ცვლილებების მიღებამდე, შენარჩუნდა და თავიდან არ განახლდა, როგორც ეს რეკომენდებულია.

”ახლა პასუხისმგებლობა ეკისრება იუსტიციის უმაღლეს საბჭოს, რათა უზრუნველყოს ინკლუზიური, გამჭვირვალე და დამსახურებაზე დაფუძნებული შერჩევის პროცესი, ვენეციის კომისიის რეკომენდაციების შესაბამისად. კანდიდატები უნდა შეირჩეს ფართო კონსენსუსის საფუძველზე და შესაბამისი დაინტერესებული მხარეების სრული ნდობით სარგებლობდნენ. ეს აუცილებელია სასამართლო დამოუკიდებლობისთვის,“- ნათქვამია განცხადებაში.